Astanada «Rýhanı jańǵyrý – gúldený men kelisim joly» atty halyqaralyq ǵylymı-tájirıbelik konferensııa bastaldy. Is-shara aıasynda Eýrazııa halyqtary Assambleıasy (EHA) otyrysy ótti.
Jıynǵa aqyn, Qazaqstannyń eńbek eri Oljas Súleımenov, Qazaqstan halqy Assambleıasy Keńesiniń múshesi, kompozıtor Tólegen Muhamedjanov jáne birqatar eldiń ǵylym jáne mádenıet qaıratkerleri qatysty. T.Muhamedjanovtyń aıtýynsha, konferensııa Rýhanı kelisim kúnine oraılastyryp uıymdastyrylyp otyr. Alystan at terletip kelgen meımandar Qazaqstannyń ultaralyq jáne konfessııaaralyq tájirıbelerin úırenip, óz elindegi bastamalarmen bólispek.
«Elbasy N.Nazarbaevtyń qoldaýymen júzege asqan Rýhanı kelisim kúni toılanyp kele jatqanyna 25 jyl toldy. Aıtýly mereke halyqaralyq jáne dinı qarym-qatynasqa úlken úles qosyp keledi. Búgingi jıynda ózara tájirıbe almastyq. Shetelden kelgen qonaqtar Qazaqstan úlgisin óz elderine júzege asyrýǵa qulshynys tanytyp otyr. Bul – elimiz úshin úlken mártebe. Qazaqstanda ótip jatqan bastamalardy halyqaralyq uıymdardyń qoldaýy jáne moıyndaýy elimizdiń abyroıy», – dedi T.Muhamedjanov.
Otyrysta eń áýeli Rýhanı kelisim kúnin toılaý máselesi qaraldy. Onda Qazaqstanda atalyp ótetin aıtýly meıramdy Eýrazııa halyqtary Assambleıasy tarapynan qoldap, ony uıymnyń halyqaralyq merekesi retinde toılaý kózdelgen. Sonymen qatar, jıyn barysynda Eýrazııa halyqtarynyń hartııasy men EHA jumysynyń nátıjesi men jospary qabyldanyp, uıym aıasynda ótetin keńester men mańyzdy merekeler, qaýymdastyqqa kirýge ótinish bildirýshiler jónindegi birqatar máseleler tóńireginde sóz boldy.
Konferensııany uıymdastyrýshylar jıynnyń túrli elden kelgen ǵylym jáne mádenıet qaıratkerleriniń, dinbasylar men memleket qyzmetshileri bas qosyp, pikir almasatyn alańyna aınalýynan úmit kútedi. Irgeli jıyndaǵy negizgi taqyryp aıasynda Qazaqstan men Elbasy N.Nazarbaevtyń zamanaýı kúrdeli máselelerdi ǵylymı negizderge súıene otyryp ońtaıly sheshý bastamalary qarastyryldy.
«Rýhanı jańǵyrý – gúldený men kelisim joly» atty konferensııa aıasynda plenarlyq otyrys ta ótti. Is-sharada jıynǵa qatysýshylar atynan uıymnyń Úndeýi qabyldandy. Onda qazaqstandyq qoǵamnyń rýhanı-adamgershilik jańǵyrýy, gýmanızm, mádenı órkendeý jolyndaǵy áreketterdi arttyrý kerek ekendigi aıtylǵan. Astanada qabyldanǵan Úndeýdi jyl sońynda Parıjde ótetin EHA qorytyndy jıynynda tanystyrý josparlanyp otyr.
Eki kúnge sozylatyn konferensııa barysynda shetelden kelgen meımandar qazaqstandyq qoǵam qaıratkerlerimen jolyǵady. Arabtanýshy jáne shyǵystanýshy, «Russia Today» telearnasyndaǵy «Dáýir kýágerleri» baǵdarlamasynyń avtory ári júrgizýshisi Halıd ál-Roshd «Álemdik aqparattyq maıdan jaǵdaıyndaǵy zamanaýı jýrnalıstıkanyń róli» atty sheberlik synybyn ótkizdi. Sonymen qatar, jıynnyń ekinshi kúninde Dintanýdy salystyrmaly túrde tereń zertteý ınstıtýtynyń qyzmetkeri Merı Pet Fısher men bilim ordasyndaǵy Syrtqy baılanys departamentiniń jetekshisi Gobınd Sadana Eýrazııa Ulttyq ýnıversıtetinde arnaıy leksııa oqylady.
Sondaı-aq, konferensııa qaıyrymdylyq sharalarymen jalǵasady dep kútilip otyr. Astana qalasy ákimdiginiń qoldaýymen eriktiler áleýmettik turǵydan turmysy tómen otbasylarǵa azyq-túlik taratyp beredi. Budan bólek, Qazaqstannyń Qyzyl jarty aı qoǵamynyń ókilderi sheberlik synybyn ótkizedi. Jıyn sońynda Rýhanı kelisim kúnine arnalǵan gala-konsert ótedi.
Abaı ASANKELDIULY, «Egemen Qazaqstan»