«Shetelge aǵylǵan jastar qataryn azaıtý maqsatynda keler jyly ShQO ákiminiń 400 granty bólinedi. Bul týraly Zyrıan aýdanyna jasaǵan jumys sapary barysynda aımaq basshysy Danıal Ahmetov málimdedi» dep habarlady oblys ákiminiń baspasóz qyzmeti.
Oblys ákimi aýdan ortalyǵy men Borodıno aýylyndaǵy orta mektepterdi aralap, oqýshylarmen kezdesti. Bilim shańyraqtarynda bolashaq urpaq qamy úshin jasalǵan jaǵdaımen tanysyp, ulttyq biryńǵaı testileý qorytyndylaryn tilge tıek etti. Kezdesý barysynda Danıal Ahmetov nege birqatar mektep túlekteriniń tańdaýy UBT emes, kórshi memleketterdiń joǵary oqý oryndaryna túsetinin ashyq aıtty.
-Keıbir mektep dırektorlarynyń biliktilik deńgeıleri tómen. Ony jasyrý úshin balalar UBT tapsyrǵylary kelmeıtindikterin aıtady. Keıbir jyly nátıje joǵary bolmaıtyn shyǵar. Biraq, kórsetkishter tómen túsip ketedi dep qoryqpaý kerek. Ol úshin mektep dırektorlaryn eshkim jumystan shyǵarmaıdy, tek bolashaqqa úlken sabaq bolady, - dedi Danıal Ahmetov. – Oblys boıynsha UBT ortasha baly 83. О́skemenniń 47 mektebiniń tek beseýi ǵana júzden joǵary ball aldy. Al Kókpekti aýdanynyń 17 mektebiniń altaýy joǵary ball jınaǵan.
Oblys ákimi sonymen qatar, Shyǵys Qazaqstanda sapaly bilim beretin joǵary oqý oryndary baryn alǵa tartty. Sondyqtan kelesi jyly 400 bilim granty bólinedi.
Azamat QASYM, «Egemen Qazaqstan»
Shyǵys Qazaqstan oblysy