Qazirgi ýaqytta naryq pen básekelestiktiń qatań talaby san túrli salaǵa syndarly synaq júrgizip jatyr. Bul baspasózge de qatysty. Sonyń ishinde jańa zamannyń qanat baılap ushqandaı ushqyr jańalyǵy dástúrli medıanyń damýyna da jan-jaqty áser etýde. О́ıtkeni jańa tehnologııa jetistikteri ınternet keńistiginiń ushy-qıyrsyz ári qoljetimdi ekenin kórsetti.
Ol óziniń aqparat taratýdaǵy jańa quraldaryn ár adamnyń qolyna ońaı ustatyp otyr. Talǵamǵa tarazy joq. Desek te oıly oqyrmanymyzdyń ormandaı uıysyp, aǵa basylymmen baılanysyna berik bolyp qalýy bizdiń jaýapkershiligimizdi ústeı tústi.
Aqparattyq alamanǵa at qosýshylar kóbeıip tursa da, «Egemen Qazaqstan» gazetiniń taralymy turaqty. Bıyl da oqyrman oıynan shyǵyp, osy údeden tabylamyz degen senim bar.
Bas basylymnyń sońǵy jyl bederinde jańa rebrendıngke aýysyp, zamanaýı talaptarǵa saı jaryq kóre bastaǵany belgili. Iаǵnı gazettiń eýropalyq pishimde shyǵýy qoǵamdyq kólikte de, ushaqta da qolǵa qolaıly ustalýyna, saraptaý men saralaýǵa qurylǵan materıaldar mazmunynyń baıytylýy tolyq ári senimdi aqparat kózin qalyptastyrýǵa, jazbalar kóleminiń yqshamdalýy ýaqytty únemdeýge óte paıdaly ekenin baıqatty.
Elbasy Nursultan Nazarbaev «Otanymyzdyń bas gazeti» dep baǵa bergen baıyrǵy basylymnyń barlyq óńirde menshikti tilshileri men tilshiler qosyndarynyń bolýy Qazaqstannyń aqparattyq keńistigin tolyq qamtıtyn rýhanı áleýetin kórsetedi. Bul resýrsqa sońǵy kezde birqatar alys-jaqyn shet elderden turaqty avtorlardyń qosylýy da jer-jahan tynysyn kózben kórgen, qolmen ustaǵan jany bar aqparattarǵa qanyqtyra túspek.
Álbette, gazetti gazet kúıinde oqyǵan lázim. Onyń kompıýter, smartfon men planshetke qaraǵanda kóz janaryna áseri, jadyǵa jattalýy erekshe bolatynyn sarapshylar jıi aıtyp júr. Bas basylym oqyrmandarynyń basym bóligin memlekettik qyzmetshiler, muǵalimder men dárigerler, áleýmettik sala sııaqty bıýdjet qyzmetkerleri men basqa da sala mamandary quraıtyndyqtan, gazettiń saıasat pen ekonomıkadan tys áleýmet, bilim men ǵylym salasyna arnalǵan arnaýly betterine, jobalaryna mańyz berilip otyr.
Aıtalyq, bilim salasy boıynsha jyl basynan beri mektep pen balabaqsha qyzmetkerlerine arnalǵan «Tálim» beti, joǵary bilim berý úrdisine baǵyttalǵan «Bilim» beti shyǵyp keledi.
Bul alystaǵy aýyldar úshin jańa bilim júıesiniń jańalyqtary men ádistemelerinen habardar bolyp otyrýǵa jasalǵan múmkindik retinde baǵalanyp otyr. Onymen shektelmeı, oqýshylardy bıylǵy jańa formattaǵy Ulttyq biryńǵaı testileýge daıarlaýǵa gazetten kólemdi oryn berildi.
Osy ispetti jobalar áli de jalǵasyn tabady. Bul rette redaksııa ózekti oqıǵalarǵa beı-jaı qaramaıtyn oqyrmanmen tyǵyz baılanys ornatýǵa múddeli. Bas basylymnyń damý tujyrymdamasy da osy maqsatqa negizdelgen. Bıyldan bastap «Egemen Qazaqstan» gazetin Astana men Almaty qalalarynda «Qazposhta» bólimshelerimen birge Halyqqa qyzmet kórsetý ortalyqtarynan da satyp alýǵa bolady. Gazetti taratý men satý jelilerin odan ári keńeıtý kózdelip otyr. Munyń barlyǵy «Egemendi» elge jaqyndatýdyń joly. Sondyqtan jazylymnyń jańa maýsymyna da belsene atsalysyńyzdar, «Egemendi» elge jaqyndatatyn Siz, mártebeli oqyrman!