L.Gýmılev atyndaǵy Eýrazııa ulttyq ýnıversıtetinde «Astana jastary» resýrstyq ortalyǵynyń uıymdastyrýymen jumys jármeńkesi ótti.
Sharaǵa qyryqtan astam mekeme qatysyp, ózderinde bar jumys oryndary týraly aqparattarmen bólisti. Aıtalyq, «Small» sýpemarketter jelisine satýshy, kassır sekildi ortańqol mamandar kerek. Al «Astana tazalyq» sııaqty kommýnaldyq mekemeler ınjener-mehanıkke zárý. «Business Consulting Group» holdıngtik kompanııalar tender jáne konsaltıng qyzmetine ýnıversıtetti endi támamdaǵan jastardy baýlyǵysy keledi.
«Astana jastary» resýrstyq ortalyǵynyń basshysy Muhamedjan Bolysbek:
– Jumys berýshi men jas mamandar arasynda dáneker bolý – bizdiń ortalyq jumysynyń basym baǵyttarynyń biri. Qaladaǵy 120-dan astam mekememen kelisimshart jasasqanbyz. Olar ózderine qajet mamandardyń tizimin udaıy jeberip otyrady. Biz ol málimetterdi júıelep, áleýmettik jelige jarııalaımyz nemese osyndaı jármeńkelerdi uıymdastyramyz, – deıdi.
Jalpylaı alǵanda, Astanada IT salasy mamandary jáne ónerkásip oryndaryndaǵy qatardaǵy qarapaıym jumysshylarǵa suranys joǵary. Alaıda jastardy qoldap isteıtin jumysty qorashsynyp, keńse qyzmetine umtylýy eńbek naryǵyndaǵy teńsizdikke sebep bolyp otyr. Osy oraıda stýdentterdiń ózimen de tildesip kórdik. Kólik-energetıka fakýltetiniń ekinshi kýrs stýdenti Armannyń aıtýynsha, jumys berýshilerdiń kóbi tolyq kúnge alǵysy keledi. Stýdentterge kún ara nemese jarty kún isteıtin jumystar kóbirek qarastyrylsa degen tilegin aıtyp qaldy.
Stýdentter sany jaǵynan elordada eń iri oqý orny sanalatyn Eýrazııa ulttyq ýnıversıteti bos oryndar jármeńkesine ádeıi tańdalyp alynyp otyr. Odan keıingileri S.Seıfýllın atyndaǵy Qazaq agrotehnıkalyq ýnıversıteti, Qazaq tehnologııa jáne bıznes ýnıversıtetinde, Jastar saraıynda uıymdastyrylatyn bolady.