«Astana» komandasynyń qorǵaýshysy Dmıtrıı Shomko Eýropa lıgasynyń toptyq kezeńinde Izraıldiń «Makkabı» klýbyna qarsy oıyn jaıly pikir bildirdi.
- Bul kezdesýge jaqsy daıyndaldyq. «Ertiske» qarsy aýyr oıynnan keıin óz qalpymyzǵa keldik dep aıta alamyn. Elimizdiń namysyn qorǵaýǵa daıynbyz.
- Jaraqatyńyzdan tolyqtaı aıyqtyńyz ba?
- Jaraqat fýtboldyń bir bóligi ǵoı. Qazir bári jaqsy. Emdelip, óz qalpyma keldim. Endi ereteńgi oıynǵa tolyqtaı daıynmyn. Jankúıerlerimniń aldynda bar ónerimdi salýǵa daıynmyn.
- «Makkabıde» belarýstik qorǵaýshy Egor Fılıpenko oınaıdy. Bizde de belorýs oıynshylary joq emes. Qarsylastaryńyzben baılanysyp, komanda jaıly surastyrdyńyzdar ma?
- Shyny kerek, ol týraly oılanǵan emespiz. «Makkabıdi» jeńý qolymyzdan keledi dep oılaımyn.
- «Makkabı» týraly oı bólisseńiz. Olardyń qandaı basym tustary bar? Kemshilikteri jaıly ne aıtasyz?
- Ras, «Makkabıdi» jan-jaqty qarastyrdyq. Olar dopqa kóbirek ıelik etkendi, qarsylastaryn jıi qysymǵa alǵandy unatady.
- «Astananyń» qupııasy nede? Nelikten óz alańynda jeńilmeı keledi?
- Biz eýropalyq fýtbol kórsetip, jankúıerlerimizdi qýantýǵa mindettimiz. Olar bizdi qoldaý úshin elimizdiń túkpir-túkpirinen keledi. Olardyń senimin aqtaýymyz kerek. Taǵy bir aıta keterim, Qazaqstan quramasy da «Astananyń» deńgeıinde oınasa eken deımiz.
- Maýsym sońy da kelip qaldy. Oıynshylardyń sharshaǵany bilinbeı me?
- Jaraqattar óz áserin tıgizbeı qoımaǵany anyq. Biraq qazir bári sońyna deıin baryn salýǵa daıyn. Jeńiske jetý basty maqsatymyz bolýy kerek. Bári óz qolymyzda.
Aıan ÁBDÝÁLI, «Egemen Qazaqstan»