Oblys ákimi Berdibek Saparbaev «Aqtóbe» fýtbol klýbynyń múshelerimen kezdesti. Kezdesý maqsaty oıynshylarmen jańa jattyqtyrýshy taǵaıyndalǵannan keıingi komanda jumysynyń nátıjelerin talqylaý boldy.
«Sizder jaqsy nátıjelerdi ýáde etken edińiz, biraq oıyn saıyn komandanyń jaǵdaıy tómendep barady. «Aqtóbeniń» maýsymdy bulaı nashar aıaqtaýy buryn sońdy bolmaǵan. Júldeli orynǵa úmitker komandalarmen úsh kezdesý ǵana qaldy. Qazirgi tańda fýtbol klýby Premer-Lıgada qala ala ma degen másele tur. Jankúıerlerdiń sizderdi qalaı qoldaıtyny ózderińizge aıan. Oıyn nátıjesi aldymen solarǵa áser etedi. Qarjylandyrýdan qıyndyq kórip otyrǵan joqsyzdar, endeshe nege qorytyndy bulaı? Bizdiń tarapymyzdan barlyq qoldaý kórsetildi, biraq tolyq berilip jasalǵan jumysty kórmeı otyrmyz,» dep óńir basshysy renishin jasyrmady.
Komandanyń bas jattyqtyrýshysy Vladımır Mýhanov týrnır kestesindegi ornyndaryna áser etken birneshe sebepter týraly óz oıyn aıtty. Olardyń ishinde komanda quramynyń asyǵys qurylýy, oıynshylardyń jaraqat alýy, klýb músheleriniń kúızelis jaǵdaıynda oınaýǵa májbúr bolýy, jeke dara oıynshylardyń derbes qatelikteri boldy.
«Árıne, tórt aıdyń ishinde jaǵdaıdy durystaýǵa bolar edi, alaıda biz oıynshylardy anyqtaý barysynda asyǵystyq tanyttyq. Bazalyq daıyndyq bolmaǵan sebepti olardyń kópshiligi jaraqat alyp, qatardan shyǵyp qaldy. Osy maýsymda nashar jumys istegen oıynshylardy atamaı-aq qoıaıyn. Eń bastysy, endi bizge aıqyn maqsat jáne jan-tánimizben berilip jumys jasaý qajet», dedi V.Mýhanov.
Kezdesý sońynda Berdibek Saparbaev komandaǵa aldaǵy oıyndarda bar kúsh-jigerin jumsaýǵa shaqyrdy. Klýbtyń komandada birigip, úılesimdi jumys isteı bilýi, temirdeı tártiptiń bolýy kerektigin eske saldy.
«Bári sizderge baılanysty. Eń bastysy utylmaý kerek! Jeńiske umtylyńyz! Sizge sáttilik tileımin,» dedi oblys ákimi.
Oıynshylar óz kezeginde artylǵan úmitti aqtaýǵa ýáde berdi.
Temir QUSAIYN,
«Egemen Qazaqstan»
Aqtóbe