Prezıdenttiń Is basqarmasy medısınalyq ortalyǵynyń aýrýhanasyna elimizdiń túkpir-túkpirinen kelip qaralýshylar men em alýshylar qatary kóp. Kóp salaly aýrýhana kez kelgen pasıentti barlyq qajetti jaǵdaımen, ıaǵnı elimizdegi eń úzdik medısınalyq qural-jabdyqtardy qoldanýymen jáne sapaly tekserýden bastap operasııadan keıingi baqylaý men ońaltýǵa deıingi qamtamasyz etýimen erekshelenedi.
Iаdrolyq medısına bóliminiń meńgerýshisi Aıgúl Sádýaqasova aýrýhanada em alýshylardyń ótinishi boıynsha magnıtti-rezonansty tomografııa (MRT) men kompıýterlik tomografııadan ótkizýdi kún saıyn, ıaǵnı senbi jáne jeksenbi kúnderi de júrgize bastaǵanyn aıtady. О́ıtkeni adam aǵzasyndaǵy kishkene ózgeristi, máselen, onkologııany der kezinde anyqtaýdyń mańyzy zor. Bizdiń qural-jabdyqtarymyz kishigirim ózgeristerdiń ózin kórýge jáne emdi óz ýaqytynda bastaýǵa múmkindik beredi, deıdi ol.
Qurylǵanyna eki jyl ǵana bolǵan medısınalyq keshen az ýaqytta sheberlikterin únemi jetildirip kele jatqan, ózge medısınalyq mekemelerdegi áriptesterine de úıretip júrgen kásibı mamandarynyń arqasynda adamdardyń senimine ıe boldy. Em alýshylar Prezıdenttik emhananyń ýaqyt pen qarjyny únemdeı otyryp, bir ýaqytta birneshe aýrýdy qatar emdeıtinin joǵary baǵalaıdy. Osy oraıda aýrýhana dırektorynyń emdeý-dıagnostıkalaý jumystary boıynsha orynbasary Raýshan Qarabaevanyń aıtýynsha, ár aı saıyn ótkiziletin «Meniń súıikti dárigerim» aksııasy aıasynda joǵary sanatty mamandardyń qabyldaýy, ınstrýmentaldy jáne zerthanalyq zertteýler quny pasıentterge qoljetimdi bolý úshin tómendetilip otyr.
Máselen, Prezıdenttik aýrýhanada eń úzdik oftalmologııalyq ortalyqtardyń biri jumys isteıdi. Onda tekserýden bastap operasııaǵa deıingi aldyn alý sharalaryna deıingi keshendi qyzmet túri kórsetiledi. Osy ortalyqta dáriger Yrzyq Jarylǵasynova kózdiń toryn nyǵaıtý ádistemesin engizip, ony belsendi túrde paıdalanyp keledi. Kóz torynyń ishki qabyǵynyń zaqymdanýy nemese kórý qabiletiniń nasharlaýy jas ulǵaıa kele paıda bolatyn jáne minez-qulyq sebepterine baılanysty álemniń árbir ekinshi turǵynynda kezdesetin kesel.
«Hırýrgııalyq neıro jáne retınoproteksııa ádistemesi degenimiz – kóz qabyǵyndaǵy suıyqtyq pen kóz almasy arasyndaǵy keńistikte dáriliik preparattardy (bıoretteýshi peptıdter) engizý. Bıoyntalandyrý úderisi bir ǵana márte, janǵa batpaıtyndaı jeńil júrgiziledi. Baǵasy da qoljetimdi, birneshe aıǵa uzarmaly tıimdiligi de bar. Kózdiń kórýi bir táýlikten soń jaqsara túsedi», deıdi dáriger.
Aýrýhana mamandary dıagnostıkalyq zertteýler men konsýltasııalar ótkizý barysynda kepildendirilgen tegin medısınalyq kómek kólemi sheńberinde stasıonarlyq emdi qajet etýshi pasıentterdi irikteıtinin, al bul sanatqa enbegen jáne erekshe kútimdi qajet etetin pasıentter aqyly bólimge júgine alatynyn aıta ketken abzal.
Dýman ANASh, «Egemen Qazaqstan»