Qazaqstan Respýblıkasynyń Premer-Mınıstri Baqytjan Saǵyntaev 2017 jyldyń 18 qazany kúni ótken kelissózderden soń málimdeme jasady. Bul týraly primeminister.kz habarlady.
«Qazir ǵana Premer-Mınıstr Sapar Isakov bastaǵan Qyrǵyzstannyń resmı delegasııasynyń ókilderimen kelissózder aıaqtaldy. Bul quramynda 30 adamy bar aıtarlyqtaı úlken delegasııa bolatyn. О́z kezeginde delegasııa ókilderiniń aýqymdylyǵy keń kólemdegi ekonomıkalyq máseleler boıynsha, jan-jaqty áńgime júrgizýge múmkindik berdi. Bul kezdesý jýyrda ǵana qyrǵyz tarapynyń bastamasymen telefon arqyly bolǵan áńgimeden soń uıymdastyryldy»,-delingen Úkimettiń resmı saıty taratqan málimdeme mátininde.
«Birinshiden biz ekijaqty ekonomıkalyq qatynastardyń problemalyq máselelerin talqyladyq. Olar bizdiń elderimizdiń shekara, kólik, fıtosanıtarlyq jáne veterınarlyq baqylaý máseleleri boıynsha ózara yqpaldastyq máselelerin qamtıdy. Sonymen qatar, EAEO pen DSU-nyń sáıkes normalary men erejeleri negizindegi kedendik jáne salyqtyq ákimshilendirýge qatysty problemalyq máseleler talqylandy. Mysaly bizdiń keden organdarymyz qyrǵyzstandyq ımport tasymaldaýshylardyń Qytaıdan Qazaqstan shekarasy arqyly taýar tasymaldaǵan kezderinde deklarasııalaý sharalaryn talapqa saı ótkizbeý áreketterin anyqtaıdy. Onyń saldarynan Qazaqstan ekonomıkasy zardap shegedi.
Qyrǵyz tarapy aldyǵa qoıylǵan máselelermen kelisti. Premer-Mınıstr Sapar Isakov Qyrǵyzstan tarapynan óz mindettemeleri men Eýrazııalyq ekonomıkalyq odaqtyń ekonomıkalyq múddelerin oryndaý baǵytyndaǵy problemalardy sheshýde tıimdi sharalardyń qoldanylatynyna kepildik berdi", - dedi Qazaqstan Úkimet basshysy.
Premer-Mınıstrdiń aıtýynsha, kelissózder nátıjesinde Qazaqstan men Qyrǵyzstan Úkimetteriniń birinshi orynbasarlarynyń tóraǵalyǵymen jumys tobyn qurý týraly sheshim qabyldanǵan. Jumys tobyna 5 kún ishinde birlesken Jol kartasyn ázirleý kerek bolady.
Jol kartasy ázirlengen soń taraptar kelisilgen máselelerdiń júzege asyrylýyn tolyqtaı qamtamasyz etýleri kerek.
"Biz sonymen qatar 2017 jyldyń 19 qazany kúni saǵat 00-00-den bastap, eki eldiń shekaralarynan ótýde basym baǵyttardyń tártibi qamtamasyz etiletindigi jóninde kelistik. Bul talaptar negizinen: Qordaıda júgi bar jeke tulǵalar, turaqty jolaýshylar tasymaldaıtyn avtokólik quraldary, jeńil kólik, júk kólikteri úshin qoldanylady», - dedi Baqytjan Saǵyntaev.