Benzın baǵasynyń óskenimen, aldaǵy ýaqytta usynystyń artýyna oraı otyn baǵasy tómendeıdi. Bul týraly Parlament Senatynda «2018-2020 jyldarǵa arnalǵan respýblıkalyq bıýdjet týraly» zańynyń jobasynyń tanystyrylymynda QR Energetıka vıse-mınıstri Baqytjan Jaqsalıev málim etti
«Jaqynda Úkimet otyrysynda kezekti ret ishki naryqqa benzındi jetkizý máselesi talqylandy. О́zderińiz bilesizder, bizdiń negizgi munaı óńdeý zaýyttarynda tıisti jumystar aıaqtalýǵa taıap qaldy. 2018 jyly munaı óńdeýdi 15 mıllıon tonnaǵa jetkizip, osy arqyly elimizde otyn tapshylyǵyn joıýǵa múmkindik jasalady», dep habarlady Jaqsalıev.
Onyń sózine qaraǵanda, búginde naryqqa benzındi jetkizýdi turaqtandyrý maqsatynda «QazMunaıGaz» Reseıden otyndy qajetti kólemde satyp aldy. Vıse-mınsıtrdiń aıtýynsha, Reseıde otyn baǵasy Qazaqstanmen salystyrǵanda qymbatyraq. Osy oraıda QMG shyǵyndarǵa tap bolýda.
«Qazirgi kezde benzınge belgili bir deńgeıde baǵanyń ósýi oryn alýda. Bul turǵyda AI-92 markaly benzınniń lıtri 165 teńge deńgeıinde bolady dep paıymdaımyz. Benzın jetkizýde daǵdarystyq qubylystyń tómendeýine qaraı, usynys kólemi artyp, baǵa tómendeıtin bolady», dedi vıse-mınıstr.
Aptanyń basynda ótken Úkimet otyrysynda QR Energetıka mınıstri Qanat Bozymbaev qazan-qarasha aılarynda AI-92 markaly benzınniń baǵasy 160-161 teńge bolýy tıis ekenin aıtqan bolatyn. Budan bólek, mınıstr taıaý ýaqytta elimizde benzın tapshylyǵy bolmaıtyndyǵyna sendirdi.