Qazaqstan Respýblıkasy Ulttyq mýzeıinde 2017 jylǵy halyqaralyq arheologııalyq zertteýler nátıjeleri boıynsha «Qazaqstan Respýblıkasy ulttyq mýzeıi arheologııalyq ekspedısııasynyń «Rýhanı jańǵyrý» baǵdarlamasy aıasynda atqarǵan jumystarynyń nátıjesi: «Qazaqstan-Japonııa, «Qazaqstan-Germanııa, Qazaqstan-Reseı» atty dóńgelek ústel ótti.
Dóńgelek ústel jumysyna Nara ǵylymı-zertteý ınstıtýtynyń professory Sadakasý Kýnıtake, Japonııanyń Qazaqstandaǵy Tótenshe jáne ókiletti elshisi Itıro Kavabata, Mádenıet jáne sport mınıstrliginiń jaýapty hatshysy Qýatjan Ýálıev, Ulttyq mýzeı dırektorynyń orynbasary, ekspedısııa jetekshisi, tarıh ǵylymynyń doktory, professor Jáken Taımaǵambetov jáne osy salada qyzmet etip júrgen ǵalymdar men jetekshi mamandar qatysty.
Bes jyldyq «Paleo Silk Road» baǵdarlamasy aıasyndaǵy Ulttyq mýzeı men Tıýbıgen ýnıversıtetiniń (Germanııa) birlesken halyqaralyq ekspedısııasy birinshi jylǵy jumysyn qorytyndylady. Strafıkasııalanǵan paleolıt eskertkishterin izdeý boıynsha júrgizilgen Maıbulaq keıingi paleolıt turaǵy jáne Shyǵys Qazaqstan óńirindegi qazba jumystaryna Ulttyq mýzeı ǵalymdary, Germanııa, Ulybrıtanııa, AQSh, Kanada, Úndistan, Chehııa ǵylymı mekemeleriniń ókilderi qatysqan. Dóńgelek ústel barysynda 2016 jyly Ulttyq mýzeı men Reseı ǵylym akademııasynyń Sibir bóliminiń Arheologııa jáne etnografııa ınstıtýtynyń mamandary ashqan Úshbulaq paleolıt turaǵyna júrgizilgen Qazaqstan-Reseı, Qarataý óńirine júrgizilgen Qazaqstan-Japonııa, Shyǵys Qazaqstan óńirin zerttegen Qazaqstan-Germanııa arheologııalyq ekspedısııasy jumystarynyń nátıjelerin professor Jáken Taımaǵambetov tanystyrdy.
«Bes jyldyqtyń alǵashqy birinshi jylynda atqarylǵan jumystardyń kóbi bastaldy. Keıbir aımaqtar jekeshelenip, ıa tabıǵı ózgeristerge qatty ushyraǵandyqtan zertteý júrgizýge qolaısyz boldy. Endigi jyldardyń jumysy budan da zor tarıhı tabystarǵa ákeledi. О́ıtkeni bul bizdiń ótkenimiz. Áli zerttelmegen obalar da óz ǵalymyn kútip jatyr» dedi ol aldaǵy kúnderge úlken úmit artyp.
Tas ǵasyrynyń jańa jıyrma eskertkishiniń ashylýy arheologııa ekspedısııasynyń jemisi. Qazaqstan tarıhyna ózge memleketterdiń ǵalymdary da asa qyzyǵyp otyr. О́ıtkeni ótken dáýirler bizdi jaqyndatady. Nara ǵylymı-zertteý ınstıtýtynyń professory Sadakasý Kýnıtakeniń aıtýynsha, Afrıkany adamzat balasynyń mekendegenine alpys myń jyl bolsa, Japonııaǵa adam aıaǵynyń tıgenine otyz myń jyl bolǵan. Japondardyń arǵy atalary Qazaqstannyń Ońtústik aımaǵynan barǵan, ıa sol jerlerdi basyp ótken dep esepteıdi. Ǵalymnyń asa qyzýǵyshylyǵyn oıatqan sebepterdiń biri osy bolsa kerek.
Ulttyq mýzeı ǵalymdary «Rýhanı jańǵyrý» baǵdarlamasy aıasyndaǵy osy jumystaryn ári qaraı tabandy túrde jalǵastyratyndar aıtty.
Baǵashar TURSYNBAIULY, «Egemen Qazaqstan»