Kóktemnen beri Astananyń dál irgesinde Qyrqynshy stansada qazaqtyń alty qanatty kıiz úıi tigilip tur. Ádettegideı toıǵa emes, dýmanǵa emes, bul shańyraq sharasyzdyqtan qurylǵan. Bul kıiz úıde alty balaly otbasy ómir súrip jatyr. Otaǵasy da, eki balasy da múgedek otbasynyń qalaısha mundaı kúıge túskenin basynan bastap baıandasaq.
Raýshan Imanǵalıevanyń 6 balasy bar. Kúıeýi men eki balasy asa aýyr deńgeıdegi bronh demikpesi dıagnozymen múgedektikke shyqqan. Kóktemde stansa mańyndaǵy kanal arnasynan asyp, jaqyn mańaıdaǵy úılerdiń irgesine sý júgirgen. Raýshan Imanǵalıeva kóktemgi sý tasqyny kezinde samannan soǵylǵan eski úı shydas bermeı, qulap qalǵanyn aıtady.
Sý shaıǵannan keıingi úı.
«Sońǵy 4-5 jylda kóktemde sý arnasynan tasıtyn. Ákimdik tehnıka berip, apattyń aldyn alyp júrdik. Degenmen, bıyl úıge tolyǵymen sý kirdi. Túnde Astana qalasy ákiminiń Almaty aýdany boıynsha bas ınspektory kelip, tótenshe jaǵdaı qyzmetkerlerin shaqyrtty. Bizdi týystarymyzdyń úıine apardy», deıdi Raýshan Imanǵalıeva.
Sý shaıǵannan keıingi úıdiń ishi
Onyń aıtýynsha, bas ınspektor Ramıl Maıshýllauly bir aıǵa páter jaldap bergen. Biraq erli-zaıyptylardyń ekeýi de jumyssyz bolǵandyqtan, páter jaldap tura almaǵan. Sóıtip, aldymen úı aldyndaǵy garajda kúneltýge májbúr bolǵan. Qazir Almaty aýdany ákimdigi ýaqytsha panalaýǵa bergen kıiz úıde turyp jatyr.
Jaldamaly páterde tura almaǵan otbasy aldymen myna garajda turǵan
«Bir jarym jasar balama operasııa jasatý kerek»Jyǵylǵanǵa judyryq demekshi, otbasynyń kishisi, bir jarym jasar bala qatty aýyryp, aýrýhanaǵa túsken. О́zi múgedek balanyń aǵzasy barlyq dárilerge keri reaksııa berip, em qonbaı jatyr eken.
Dári-dármekter
«Balamnyń allergııasy neden ekeni anyqtalmady. Dárigerler «Ana men bala» ortalyǵyna baryp, anyqtaýǵa bolady dedi. Biraq aqyly emge qarajat jetispeıdi. Kvota alý jeńil bolǵanymen, úıden shyǵa alar emespin. Joldasym jıi aýyrady», deıdi Raýshan Imanǵalıeva.
Qylyshyn súıretip qys keledi. Otbasy áli kıiz úıde otyrKıiz úıde túnep júrgen alty bala men qamkóńil ata-ananyń jaǵdaıy kúzdiń qara sýyǵynda qandaı ekeni aıtpasa da túsinikti shyǵar. Eń qıyny, jańbyr jaýsa, sý sorǵalaıdy.
Kıiz úıdiń janynda jańa úıdiń qurylysy júrip jatyr
«Jańbyr jaýsa, sý saryldap aǵyp, shylqyp ketemiz. Qazir tek múgedektik boıynsha beriletin járdemaqyǵa kún kórip otyrmyz. Qajetti dári-dármektiń keıbiri tegin beriledi, keıbirin satyp alamyz. Búkil kıimderimiz sýdan shaıylyp, shirip ketti. Qazir balalarymnyń aıaǵynda aıaq kıim joq. Jazdyq kıimmen júr», deıdi ol.
Jalǵyz járdemaqyǵa qarap otyrǵan Raýshan Imanǵalıevanyń qatarynan alty aıaq kıim, alty kúrte alatyn shamasy joq. Sondyqtan, ázirge kezek-kezek kıim alǵaly otyr.
«Asar» keledi degende, alty bala bórikterin aspanǵa laqtyrǵan
«Kómek surap barmaǵan jerim, baspaǵan taýym joq. Barlyǵy ákimdikke silteıdi. Ákimdik qoldan kelgen kómegin kórsetip jatyr. Zań boıynsha olar bizge úı salyp berýge mindetti emes. Sodan, «Zeket» qoryna bardym. Olar kómektese almaıtynyn aıtty», deıdi Raýshan Imanǵalıeva.
«Zeket» qoryna habarlasqanymyzda qor ókili der kezinde qarjy bolmaǵanyn aıtty. Alaıda qorǵa ótinish jazsa, komıssııa tekserisinen keıin kómek kórsetilýi múmkin.
Aýdandyq ákimdik de saýapty iske demeýshi tabylsa, úıdiń qurylysyna qolda bar kómekti aıamaımyz degen.
Úıdi salýda eski qurylys materıaldary paıdalanylǵandyqtan, qurylysshylar bútin qabyrǵadan tereze oıýǵa májbúr bolǵan
Osyndaı sharasyz kúıde otyrǵan otbasy qaıyrymdylyq qorlarynyń taǵy birine habarlasqan. Qordyń jetekshisi Kóńilbaı Shókenov asarmen úı salýǵa bolatynyn aıtqan.
Jańadan salynyp jatqan úı
«Biz Semenovka degen aýylda sý basqan 35 úıdiń úsheýin qaıta salyp, qalǵan 32 úıdi materıaldarmen qamtımyz dep sheshkenbiz. Raýshan apaıǵa kómektesý josparymyzda bolmasa da, jaǵdaıyn kórgennen keıin bas tarta almadyq. Qazir bizde qurylys materıaldarynyń 70 paıyzy bar», deıdi qaıyrymdylyq qorynyń negizin qalaýshy Kóńilbaı Shókenov.
Onyń aıtýynsha, úı qurylysyn asarlatyp, alǵashqy qarǵa deıin bitirý josparlanǵan.
Qurylys júrip jatqan úıdiń ishi. Jańa úı úsh bólmeli bolady dep josparlanǵan
«Árıne, ákimdik qol ushyn berip jatyr. Tehnıkamen qamtyp otyr. Adamdar da jiberdi. Biraq qalǵan 30 paıyz materıaldy tabý úshin tarshylyq kórip jatyrmyz. Bári qarjyǵa tirelip tur. Qurylys basynda da adam sany az. Eriktiler bolsa, eki aýysymmen jumys istesek te, úı qurylysyn bitirip berýge bolar edi», deıdi qaıyrymdylyq qoryndaǵylar.
«Bizge eń keregi – úı qurylysyna qajetti qarjy»«Jýrnalıster jaǵdaıymyzdy telearnaǵa túsirip, gazetke jazyp alyp ketedi. Árıne, adamdar kelip, «qandaı kómek kerek?» dep surap jatady. Jaǵdaıymyzdy kórip ketedi. Biraq qaıta aınalyp kelmeıdi», deıdi qamkóńil ana.
Qazir qarjy men jumys kúshiniń azdyǵynan qurylys baıaý júrip jatyr. Biraq tym quryǵanda úıdiń negizgi bóligi bitse, 6 bala kıiz úıde qystamaıdy...
Kıiz úıdiń ishi
Qurylystyń basy-qasynda bolý úshin Raýshan apaıdyń úlken uly jumysynan shyqqan. Otbasy kez kelgen qarjylaı nemese materıaldyq kómekti qýana qabyl alady. Kómek beremin deýshiler bolsa, redaksııamyzǵa habarlassańyzdar bolady. Bizdiń baılanys nómirimiz: 8 (7172) 376527 (150). Kıim-keshek túrinde kómek beremin deýshilerge balalardyń jasyn kórsetkendi jón kórdik:
Balasy
Jasy
Ul
22
Qyz
20
Qyz
13
Ul
12
Qyz
4
Ul
1,5
Kıiz úıdiń ishi
Gúlnur Qýanyshbekqyzy,
«Egemen Qazaqstan»
Sýretterdi túsirgen Erlan Omar,
«Egemen Qazaqstan»