Kútý
Keıde bir qýanyshty kúndi asyǵa kútesiń. Biraq... oǵan deıingi jaı kúnderdiń bári de sol Baqytty kúnniń jolynda qurbandyq bolyp jatqandaı kórinedi.
Tabylmaǵan teńiz
Myna ómirdi ózenge teńeıtin bolsaq, sonda onyń aǵyp baryp quıatyn teńizi qaıda? Álde qumǵa sińip kete me eken?..
Taý
Ol ne? Tek ásheıin tastardyń úıindisi ǵana ma?! Joq álde, kóz shyrymyn alyp jatqan tarıh pa?..
Rýh
Birde biz Raıymbek dańǵylynyń boıyndaǵy zıratqa baryp, uly Muhańnyń – Muhtar Áýezovtiń qabirine zııarat etip, quran oqydyq. Jo-joq. Sizderge ótirik aıta almaımyn. Muhań ol jerde joq sııaqty. Sonda... uly sýretkerdiń rýhy qaıda? «Ol – «Abaı joly» epopeıasynda!», deıdi ishtegi bir jumbaq daýys.
Daladan qalaǵa kelgender
Bizdiń kópshiligimizge tán nárse – áý bastaǵy topyraǵymyzdan jel ushyryp áketip, bóten jerge kelip túsken dánge uqsaıtynymyz. Árıne ol dán jersinip, tamyr jaıyp ketse jaqsy, al eger, býlyǵyp, asfalttyń jaǵasyndaǵy butadaı tútinge tunshyǵyp, tyrbıyp qalsa she?!
Shybyn jan
Qý taqyrǵa aınalǵan kári keýdedegi qara shybyn: «Men baıaǵyda-a-a appaq qus bolatynmyn!..», deıdi. Senesiz be?..
Sońǵy kún
Adam ǵumyrynyń eń sońǵy kúni. Ol da tańerteńgilik ádettegi jaı kúnderdiń biri bolyp bastalar ma eken?..