Táýelsizdik jyldarynda buqaralyq aqparat quraldary, baılanys pen aqparattandyrýdyń barlyq aspektileri boıynsha zańnamalyq baza qalyptasty. Arnaıy zańdar qabyldandy.
Ýaqytpen birge olar da jańaryp keledi. Atyraýda keıbir zańnamalyq aktilerge aqparat jáne kommýnıkasııalar máseleleri boıynsha ózgerister men tolyqtyrýlar engizý týraly ótken dóńgelek ústelde salany nyǵaıtý, otandyq aqparat deńgeıin kóterý, kommýnıkasııalyq ınfraqurylymdy damytý jaıy sóz boldy.
Zań jobasyn talqylaýǵa arnalǵan sharaǵa QR Parlament Májilisiniń tóraǵasy Nurlan Nyǵmatýllın, oblys ákimi Nurlan Noǵaev, Aqparat jáne kommýnıkasııa mınıstrliginiń, memlekettik organdar men respýblıkalyq, aımaqtyq buqaralyq aqparat quraldarynyń ókilderi, sarapshylar men blogerler qatysty.
Májilistiń áleýmettik-mádenı damý jónindegi komıteti uıymdastyrǵan dóńgelek ústelde Nurlan Nyǵmatýllın jańa zań jobasyn aımaqtarda talqylaý oń nátıje beretinin, otandyq aqparat keńistiginiń básekege qabilettiligin arttyryp, damytý úshin salalyq zańnamalardy jetildirý qajettiligin atap ótti.
Internet-resýrstar, áleýmettik jelidegi akkaýnttar, aqparat aınalymy, ınternet paıdalanýshylardyń jaýapkershiligi zań júzinde rettelýi tıis. Avtorlyq quqyq, aqparatty zańsyz, paıda tabý maqsatynda paıdalaný jaıy da ózekti taqyryp.
Májilis Tóraǵasynyń aıtýynsha, kóptegen máselelerdi zańdyq turǵyda retteý qajettiligi Úkimettiń qoldanystaǵy zańnamaǵa ózgerister engizýine túrtki bolǵan. «Memleket basshysy táýelsizdik alǵan kúnnen bastap sóz bostandyǵyn qamtamasyz etýge jáne otandyq aqparat quraldarynyń damýyna erekshe jaǵdaı jasady. Prezıdenti árqashan da mańyzdy sheshimderdiń barlyǵyn halyqpen aqyldasyp qabyldaý kerektigin aıtyp keledi. Sondyqtan, osy qujat ta Parlament Májilisinde, qoǵamdyq ortada keńinen qaralyp, kóptegen sharalar ótti. Otandyq buqaralyq aqparat quraldarynyń jumysynyń tıimdiligin arttyrýǵa, básekege qabiletti aqparattyq naryq qalyptastyrýǵa, elimizdiń aqparattyq qaýipsizdigin qamtamasyz etýge jol ashatyn zańdy bárimiz birlesip jasaýymyz kerek», - dedi N.Nyǵmatýllın.
Ashyq dıalog alańynda Qaznet jumysyn uıymdastyrý, áleýmettik jelilerdegi pikirlerdi sáıkestendirý, memlekettik organdardyń aqparatty berý jedeldigi, zańmen qorǵalatyn qupııalardyń BAQ-ta jarııalanýyna kelisim alý, joqqa shyǵarý mehanızmi, aqparat taratý kezinde kámelettik jasqa tolmaǵandardy qorǵaý máseleleri de aıtyldy.
Dóńgelek ústel otyrysynan keıin Májilis Tóraǵasy, «Nur Otan» partııasy Saıası keńes Bıýrosynyń múshesi N. Nyǵmatýlın partııanyń Atyraý oblystyq fılıalynda azamattardy jeke suraqtar boıynsha qabyldady. Spıkerdiń qabyldaýyna kelgender «Atyraý - Astrahan» jolynyń jóndelýi, jańa mektep salý, turǵyn úılerdiń gazben qamtamasyz etilýi syndy áleýmettik máselelerdi alǵa tartty.
Nurlan Nyǵmatýlın ol máselelerdiń zańnamalyq turǵydan sheshý múmkindikterin qarastyryp, jergilikti atqarýshy organdar ókilderimen arada bolǵan kelisimderdiń oryndalýyn baqylaýǵa alatynyn aıtty.
Baqytgúl BABASh,
«Egemen Qazaqstan»
ATYRAÝ
Sýretti túsirgen
Erlan ALTYBAEV