Ońtústik Qazaqstan oblysynda jalpy óńirlik ónim kólemi jyl saıyn artyp keledi. Osy jyldyń birinshi jarty jyldyǵynda oblysta jalpy óńirlik ónim kólemi 1 340,5 mlrd. teńgeni qurap, 2,7 paıyzǵa artty. Búgin bul týraly oblys ákimdiginiń kezekti májilisinde oblystyq ekonomıka jáne bıýdjettik josparlaý basqarmasynyń basshysy Arman Sábıtov málim etti.
Basqarma basshysy jyl sońynda jalpy óńirlik ónim kólemi 3 014,5 mlrd. teńgeni quraıtyndyǵyn jetkizdi. Osylaısha Ońtústik Qazaqstan oblysy respýblıka kóleminde ósim boıynsha 5- orynǵa turaqtamaq. Al, óńdeý ónerkásibi óniminiń kólemi 410,8 mlrd. teńgeni qurap, 2,1 paıyzǵa artqan. Alaıda ónerkásip ónimi boıynsha ındıkatordyń oryndalmaý qaýipi bar. Jyldyq jospardy qamtamasyz etý úshin ónim kólemin 850 mlrd. teńgege jetkizý qajet. Alaıda Shymkent qalasy men Báıdibek, Otyrar aýdandarynyń ındıkatorlary jyldyq jospardan artta qalýda.
«Qazirgi kezeńde sońǵy 9 aıda ónerkásip ónim kólemi 605 mlrd. teńgeni quraýy qajet bolatyn. Alaıda 9 aıdyń qorytyndysymen ónim kólemi 599,2 mlrd. teńgege jetip otyr. Budan bólek, óńirimizde tirkelgen shaǵyn jáne orta kásipkerliktiń áreket etetin nysandarynyń úlesi 83 paıyzdy qurap, ındıkatordyń oryndalmaý qaýipi bar. Sońǵy 9 aıda tirkelgen shaǵyn jáne orta kásipkerlik nysandarynyń sany 213 419 bolsa, olardyń 36 796 áreket etpeıdi. Onyń ishinde eń joǵary deńgeı Shymkent qalasynda tirkelip otyr. Iаǵnı qaladaǵy 21 815 shaǵyn kásipkerlik nysandarynyń jumysy toqtap tur», - dedi Arman Sábıtuly.
Sondaı-aq, qoǵamdyq qaýipsizdikti qamtý maqsatynda ishki ister departamentine bıýdjetten bólingen qarjy kólemi jyl saıyn ulǵaıǵanymen salaǵa qatysty birneshe ındıkatorlardyń oryndalmaýy baıqalady. Atap aıtqanda, jasóspirimder jasaǵan qylmystardyń úlesiniń jospary 3,4 paıyz bolsa, naqty 9 aıda – 3,5 paıyzdy quraǵan. О́tken jyldyń 9 aıymen salystyrǵanda kórsetkish Shymkentte, Qazyǵurtta, Maqtaralda, Otyrarda, Saıramda, Tólebıde, Shardarada, Kentaýda, Túrkistanda ósken.
Jıynda aıtylǵan olqylyqtarǵa qanyqqan óńir basshysy aýdan, qala ákimderi men salaǵa jaýapty basshylardyń jumysyn synǵa alyp, birqatar tapsyrmalar júktedi.
«Birqatar aýdan-qalalarda tirkelgenimen áreket etpeıtin shaǵyn jáne orta kásipkerlik nysandary kóbeıip otyr. Memleket pen úkimet tarapynan qanshama qoldaýlar kórsetilip otyrǵan kezeńde shaǵyn jáne orta kásipkerlikti turalatýǵa bolmaıdy. Máselen, Shymkent, Sozaqta, Tólebıde, Túlkibasta shaǵyn jáne orta kásipkerlik nysandarynyń sany azaıǵan. Aýdan, qala basshylarynyń osy rettegi jumystaryna qanaǵattanarlyqsyz degen baǵa berýge bolady. Budan bólek, birqatar aýdan qala ákimdikterinde tek bıýdjettik ınvestısııalarmen shektelip, jeke ınvestısııa tartý boıynsha jumystar tómen deńgeıde júrgizilýde. Jyl sońyna deıin osy olqylyqtardyń ornyn toltyrýdy jáne apta saıyn aqparat berip otyrýdy tapsyramyn», - dedi Janseıit Qanseıituly.