Búgin Almaty qalasyna jumys sapary barysynda QR Premer-Mınıstri Baqytjan Saǵyntaev Reprodýktıvti medısına ınstıtýtynyń (RMI) EKU ortalyǵyna bardy, onda densaýlyq saqtaýdyń halyqaralyq standarttary deńgeıinde bedeýlikti emdeý men joǵary tehnologııalyq medısınalyq kómek kórsetiledi.
Baqytjan Saǵyntaev ǵımaratty aralaý barysynda tirkeý bóliminiń, koll-ortalyqtyń, jumys kabınetteriniń jáne EKU-zerthanalarynyń jumysymen tanysty. О́z kezeginde ınstıtýt dırektory Tamara Júsibalıeva Premer-Mınıstrdi ortalyqtyń qyzmeti, áleýmettik jaýapkershilik aıasynda mindetterdiń oryndalýy, sondaı-aq, reprodýktıvti medısınadaǵy jetistikter men ǵylymı qyzmet týraly aqparattandyrdy.
Aıta ketý kerek, 2017 jyly EKU ortalyǵynda jergilikti ákimdik qarajaty esebinen 300 almatylyq otbasy tıisti medısınalyq kómek aldy jáne taǵy shamamen 700 adam kezekte tur.
Jańa klınıka halyqaralyq talaptardy esepke ala otyryp turǵyzylǵan jáne zamanaýı jabdyqtarmen jaraqtandyrylǵan. Onyń ereksheligi tolyqtaı oqshaýlandyrylǵan operasııalyq blogy men embrıologııalyq zerthanasynyń bolýynda. Bul mıkroklımatty saqtaýǵa jáne turaqty temperatýra men ylǵaldylyqtyń zararsyzdandyrylǵan aýamen qamtamasyz etilýine múmkindik beredi. Osyndaı «taza ǵımarat» júıesi joǵarǵy klınıkalyq nátıjeler berip, emdeý tıimdiligin aıtarlyqtaı arttyrady.
Budan ózge, klınıka Almatyda medısınalyq týrızm damýynyń jarqyn mysaly bolyp tabylady. RMI dırektorynyń aıtýynsha, kórsetiletin medısınalyq qyzmetter baǵasynyń arzan bolýyna qaramastan, sheteldik analogtarynan kem túspeıdi. Dárigerlerdiń joǵary biliktiligi, zamanaýı jabdyqtar men Qazaqstan zańdarynyń beıildiligi sheteldikterdiń kóptep kelýine jol ashýda. Eki jyldyń ishinde Almatyǵa Túrkııadan, QHR-dan, Germanııa, Reseı jáne AQSh-tan kelgen emdelýshilerdiń sany medısınalyq týrızm jelisi boıynsha birneshe esege artty. Jyl saıyn RMI klınıkasy 3 000-ǵa deıin otbasyn qabyldaı alady.
Aıta keteıik, 2017 jyly Almaty oblysynyń densaýlyq saqtaý júıesin qarjylandyrýǵa 48,4 mlrd teńge qarastyrylǵan. 1 qazandaǵy jaǵdaı boıynsha 31,6 mlrd teńgesi nemese jyldyq jospardyń 65,3% ıgerilgen.
«Taý samaly» aýylynda emhananyń, patologııalyq-anatomııalyq bıýro men segiz qurylystyń jalpy somasy 6,3 mlrd teńgege qurylysy jalǵastyrylyp jatyr. Segiz nysanda jalpy somasy 2,9 mlrd teńgege qalypqa keltirý jumystarymen seısmıkalyq kúsheıtý jáne kúrdeli jóndeý jumystary júrgizilýde. 2017 jyly qalanyń Naýryzbaı aýdanynda «Týǵan jer» baǵdarlamasy aıasynda salynǵan jańa emhana paıdalanýǵa berildi. Onda alǵashqy medısınalyq kómek kórsetýden ózge, asqazan qyltamaǵyn erterek anyqtaıtyn skrınıngtik zertteýler júrgiziledi.
Sondaı-aq, emhanada rentgen dıagnostıka bólimsheleri, oftalmolog, otolarıngolog, torakaldy jáne abdomınaldy koloproktologııa kabınetteri jáne t.b. ashylǵan. Budan ózge, elektrondy tirkeý qyzmeti, koll-ortalyq jumys isteıdi, Naýryzbaı aýdanynyń turǵyndaryna shuǵyl kómek kórsetý brıgadasy qyzmet kórsetedi. Jaqyn arada «Qalqaman» shaǵyn aýdanynda medısınalyq mekeme ashylady.