О́skemendikter Almaty qalasynda kıokýshınkaı-kan karate boıynsha ótken el chempıonatynda júldeger atanǵan sportshylardy qushaq jaıa qarsy aldy. Bul týraly oblystyq dene shynyqtyrý jáne sport basqarmasynyń baspasóz qyzmeti habarlady.
14 oblys jáne Astana, Almaty qalalarynan barlyǵy 275 sportshy qatysqan el chempıonatynda jas sportshylarymyz sátti óner kórsetti. Aıta keteıik, jarys «Kýmıte» jáne «Kata» dep atalatyn 2 jattyǵý túri boıynsha ótti. Oblys atynan 27 sportshy synǵa tústi. Bıylǵy jyly shyǵysqazaqstandyq sportshylar tek Astana qalasynan jáne Aqmola oblysynan kelgen quramalardy alǵa jiberip, jalpykomandalyq esepte 3-shi orynǵa ıe boldy. Oblys quramasynyń qorjynynda 4 altyn, 5 kúmis jáne 8 qola medal bar. Aımaq quramasynyń sapynda óskemendikterden bólek, Glýbokoe, Shemonaıha aýdandarynyń jáne Semeı qalasynyń sportshylary boldy.
– Eń birinshi bizdiń barlyq bapkerlik quramǵa, qoldaý tanytqan ata-analarǵa alǵysymdy bildirgim keledi. Atalmysh sport túriniń damýyna eleýli úles qosyp kele jatqan Shyǵys Qazaqstan oblysynyń Dene shynyqtyrý jáne sport basqarmasyna jeke alǵysymdy aıtqym keledi, – dedi Shyǵys Qazaqstan oblystyq kıokýshınkaı-kan karate fılıalynyń jetekshisi Rýslan Alshymbaev.
Úzdik nátıje kórsetken sportshylar qarashanyń 19 kúni Rýmynııada ótetin Eýropa chempıonatyna attanatyn bolady. Ol jarystan keıin oblys quramasy jeltoqsannyń 23-24 kúnderi Astana qalasynda ótetin halyqaralyq jarysta baq synamaq.
«Kýmıte» jattyǵýy boıynsha jeńimpazdar men júldegerler:
40 kılo salmaqta:
1-oryn D.Kostýbaev.
45 kıloda:
1-oryn G.Gýrov.
45 kılodan joǵary salmaqta:
1-oryn J.Edlıpova.
50 kıloda:
2-oryn S.Kartavseva.
65 kıloda:
2-oryn D.Baklashov,
2-oryn E.Daýbaev.
50 kıloǵa deıingi salmaqta:
3-oryn D.Mıtrofanov.
45 kıloǵa deıingi salmaqta:
3-oryn D.Qazybekqyzy.
60 kıloda:
3-oryn R.Kýrıatkov.
80 kıloda:
3-oryn B.Aksenov.
55 kılodan joǵary salmaqta:
3-oryn A.Ojogına.
55 kıloda:
3-oryn M.Vasılev.
60 kıloǵa deıingi salmaqta:
3-oryn V.Chenze.
Sondaı-aq, «Kata» jattyǵýy boıynsha óz salmaq dárejesinde M.Kalıýjın 1, J.Edlıpova 2 jáne A.Semizbaeva 3 orynǵa ıe boldy.
Azamat QASYM, «Egemen Qazaqstan»