Siz ne kórip júrsiz oqyrman?
Telearna jasty da kárini de ózine baýrap alatyn qýatty qural. Onda kórsetiletin shaǵyn jarnamadan bastap úlken jobalarǵa deıin halyqqa bereri kóp sapaly dúnıe bolǵany abzal. «Otandyq telearnalarda ilip alarlyq baǵdarlamalar saýsaqpen sanarlyq» degen turpattaǵy syn-pikirler sońǵy ýaqyttary qoǵamda jıi aıtylyp qalyp júr. Degenmen, kórermen kóńilin kókjıekke kóteretin tyń jobalardyń da bar ekendigin joqqa shyǵarýǵa bolmas.
Bul «Qazaqstan ulttyq arnasy» arqyly kórermenge jol tartqan «Qyzyq eken» baǵdarlamasynyń birer sanyn kórgennen keıingi alǵan áserimizden týǵan oı. Qatyp qalǵan qasań qaǵıda, qaıtalana beretin qarabaıyr qalyp halyqty jalyqtyrǵaly qashan. Al «Qyzyq ekendi» kórgende qyzyqtyń ishine qalaı kirip ketkenińizdi bilmeı qalasyz. Tanym-kókjıegińizdi kóteretin túrli vıktorınalyq suraqtar oı ormannyń arasyna alyp ketkende «eee rasynda solaı eken ǵoı» dep tańyrqaısyz. Álemniń ár túkpirinde bolyp jatqan túrli qyzyqtarǵa saıahat jasap, sanańyzǵa múlde kirip shyqpaǵan tyń aqparatqa qanyǵasyz. Baǵdarlamanyń biz baıqaǵan basty ereksheligi – bir qalyppen shektelip qalmaı kórermendi san qyrynan tarta bilýinde. Bilim qorjynyńyzdy molaıtatyn mol aqparat, oılaý qabiletińizdi arttyratyn logıkalyq saýaldar, ádemi astarly ázil, shyǵarmashylyq erkindik, halyqqa tanymal tulǵalardyń oı-óresin kórsetip jańa qyrynan ashý syndy birneshe baǵyt bir baǵdarlamanyń óne boıynan tabylady. Eń bastysy barlyq jastaǵy kórermenniń talǵamyna saı. Jobanyń tabıǵatynan keıbir shoý-baǵdarlamalardaǵydaı shekten tys usaqtyq, arzan sóz, ájýa áńgime árinin kórmeısiz. Otandyq telekeńistikte kóptegen týyndylarymen tanylǵan Serik Aqyshev jetekshilik etetin jobany tanymal telejúrgizýshi Rahman Omar júrgizedi. Baǵdarlama jelisi, júrgizýshiniń sóz saptaýy, stýdııa qonaqtarymen tyǵyz baılanys bári ádemi úılesim tapqan. «Ǵalam ǵajaıyptary», «Sen bilesiń be», «Qazaq sporty», «Tulǵa», «Zertteý» sııaqty ár shyǵarylym saıyn aýysyp otyratyn aıdarlar kóptegen tarıhı derekterden, qyzyqty jańalyqtardan syr shertedi.
Tek, úlken-kishini tegis baýrap alatyn halyqqa paıdasy mol tanymdyq joba jurttyń bári jumystan qaıtyp otbasy músheleri ekran aldyna túgel jınalatyn keshki ýaqytta kórsetilse degen oı mazalaıdy. О́ıtkeni, túske deıingi ýaqytta zeınetkerler men túski aýysymda oqıtyn oqýshylar bolmasa, telearnanyń negizgi aýdıtorııasy sanalatyn kópshilik halyq jumysta bolady. Bul bizdiń emes, áleýmettik jelide baǵdarlamaǵa baılanysty pikir bildirgen kórermenderdiń arman-tilegi. Kóp bilý adamzat úshin eń asyl qazyna desek atalǵan jobanyń negizgi maqsaty «Tal besikten, jer besikke deıin bilim al» degendi úndeıtindeı. Sebebi, dúnıede biz bilmeıtin qyzyqtar men qupııalar óte kóp. Bilýge qumartqan jas órenderdi jalyqtyryp almaı ár qyzyqty aqparatty zamanǵa saı ıkemdep jeńil ári áserli jetkizetin «Qyzyq eken» sııaqty jańasha turpattaǵy tanymdyq dúnıeler kóp bolsa eken deısiń. Siz ne kórip júrsiz oqyrman?
Arman OKTIаBR,
«Egemen Qazaqstan»
ALMATY