EKSPO tehnologııalaryn tájirıbe júzinde qoldanýǵa baılanysty Úkimette baspasóz máslıhaty ótti. Jıynǵa Qostanaı memlekettik pedagogıkalyq ınstıtýtynyń rektory Erkin Ábil, Qaraǵandy memlekettik ındýstrııalyq ýnıversıtetiniń rektory Baqyt Jáýtikov, Sh.Esenov atyndaǵy Kaspıı memlekettik tehnologııalar jáne ınjınırıng ýnıversıtetiniń rektory Berik Ahmetov qatysyp, óz oqý oryndarynda júzege asyrylyp jatqan jobalarmen tanystyrdy.
Qostanaılyq oqý ordasynyń rektory Erkin Ábildiń aıtýynsha, oblys EKSPO-2017 halyqaralyq kórmesine qoıylǵan 105 jobanyń 10-yn iriktep alypty. Aıtalyq, «Qostanaı sý» qalalyq kommýnaldyq kásiporny aýyz sýdy tazartý tehnologııasy baǵytyndaǵy eki jobany júzege asyrýdy josparlap otyr. Bul jalpy kólemi 50 mln tekshe metrdi quraıtyn aǵyndy sýlardy ekologııalyq talaptarǵa saı tazartýǵa múmkindik beredi. Demek, turǵyndar da ábden súzgiden ótken sapaly aýyz sýdy tutynady degen sóz.
Qostanaı ýnıversıteti tańdap alǵan jobalardyń ishinde kún kózinen qýat alatyn kósheni jaryqtandyrý tehnologııasy da bar. Qazirdiń ózinde Lısakov qalasynyń kóshelerine kúnnen qýat alatyn osyndaı 20 jaryqsham ornatylypty.
Sondaı-aq tyń jobalardyń ishinen Germanııamen birlese júzege asyrylatyn jylý berý júıesi tehnologııasyn da atap ótýge bolady. Jylý qazandyǵyna ornatylatyn mundaı qondyrǵy arqyly qala aı saıyn 3,5 mln teńge únemdeı alady eken.
Al Kaspıı ýnıversıtetiniń rektory EKSPO kórmesi barysynda sıfrlandyrý, oqý prosesin ońtaılandyrý, bilim ordasyn smart ýnıversıtet deńgeıine jetkizý baǵytyndaǵy jobalardy qup kórgenderin jetkizdi. Onyń aıtýynsha, jahandyq kórme oqytýshylar men stýdentterdiń zamanaýı jobalarǵa degen qyzyǵýshylyǵyn arttyryp, zertteý jumystaryna tyń serpin bergen. Búginde ýnıversıtet balamaly energııa kózderin paıdalanýǵa den qoıa bastapty. Qazirdiń ózinde oqý ordasynda qoldanylatyn jańǵyrmaly energııa kózderi 1 paıyzdy quraıdy, endi úsh jylda onyń kólemin 10 paıyzǵa jetkizý kózdelýde. Sondaı-aq bilim ordasy smart-ýnıversıtet deńgeıine eki jyldyń ishinde qol jetkizýdi maqsat etip otyr.
Al Qaraǵandy memlekettik ındýstrııalyq ýnıversıteti tájirıbege engizý úshin kórmedegi 105 jobany iriktep alypty. «Halyqaralyq kórmeniń arqasynda sheteldik áriptestermen tikeleı pikir alysyp, tájirıbe almasýǵa múmkindik týdy. Búginde Reseı, Polsha, Avstrııa, Germanııa elderiniń ǵalymdarymen birlese jumys jasaý jóninde kelisimge keldik», deıdi rektor B.Jáýtikov. Ýnıversıtet tańdaǵan jobalardyń qatarynda energııany únemdeıtin jylý qondyrǵylary, «aqyldy» jylý júıeleri, kúnnen qýat alatyn modýlder, kógildir kómir, taǵy basqalar bar.
Ýnıversıtet rektorlarynyń aıtýynsha, endi ǵana qoldanysqa engizile bastaǵan jańa tehnologııalardyń ekonomıkalyq tıimdiligi týraly aıtý áli erte. Alǵashqy jobalardyń paıdasyn el bıylǵy jyldyń sońynan bastap kóretin bolady.
Qymbat TOQTAMURAT, «Egemen Qazaqstan»