Tuńǵysh ret qoldanylǵan tájirıbe sátimen júzege asyryldy.
35 jastaǵy petropavldyq turǵynnyń ókpe dimkásine shaldyqqanyna on jylǵa taıap qalypty. Asqyndyryp alǵandyqtan qansha em-dom qabyldasa da, qulan-taza aıyǵyp kete almaǵan. Syrqaty janyna qatty batqan ol dárigerlerdiń keńesine qulaq asyp, operasııa ústeline jatýǵa táýekel etken. Baǵyna qaraı elimizde alǵash ret qoldanylǵan zamanaýı ota ádisine kezigip, birden kelisken.
– Buǵan deıin ol óte álsiz bolatyn. Júrip-turýy qıynǵa soqqandyqtan, tez entigip, sharshap qalatyn. Tegin otadan keıin jaǵdaıy jaqsaryp, jaqyn arada úıine oralady, dedi oblystyq týberkýlezge qarsy dıspanserdiń hırýrgııa bólimshesiniń meńgerýshisi Tobyljan Jamaqov naýqastyń qazirgi jaǵdaıy týraly.
Onyń aıtýynsha, bul ádisti ulttyq ftızıopýlmonologııa ǵylymı ortalyǵy ókpe hırýrgııasy bóliminiń meńgerýshisi, professor Qulahmet Erimbetov osydan eki jyl buryn tájirıbege engizgen eken. Buǵan deıin naýqastyń jarty ókpesi men birneshe qabyrǵasy alynyp tastalyp, saldarynan júrisi ózgerip, bir jaǵyna qaraı qısaıyp qalatyn. Endi qabyrǵalardyń astyna sılıkon qoıý arqyly ókpedegi tesikter biteledi. Arnaıy ımplant týberkýlez taıaqshalarynyń tarap ketýiniń, vırýstardyń kóbeıýiniń jolyn kesedi. Sılıkondy ımplanttyń quny 400 myń teńge turady, shyǵyn memleket tarapynan óteledi.
Bas dáriger Qanysh Bıjanov jyl ótken saıyn materıaldyq-tehnıkalyq bazanyń nyǵaıa túskenin, kúrdeli jóndeý jumystaryna 100 mıllıon teńge bólingenin, joǵary tehnologııaǵa negizdelgen medısınalyq qural-jabdyqtar satyp alynǵanyn jetkizdi.
Búginde 648 adam arnaıy esepke alynyp, turaqty em-dom kórsetilýde. Jańa tásilmen úsh naýqasqa ota jasaý mindeti tur.
О́mir ESQALI, «Egemen Qazaqstan» Soltústik Qazaqstan oblysy
Sýretti túsirgen Amangeldi BEKMURATOV