«Nazarbaev zııatkerlik mektepteri» DBBU Basqarma tóraıymy Kúlásh Shámshıdınova búgingi balalardyń aldyńǵy býynǵa qaraǵanda kóp ózgergenin jetkizdi. Bul týraly «Bilim berýdiń jarqyn bolashaǵyna arnalǵan qundylyqtar, ál-aýqattylyq jáne ınnovasııa» taqyrybynda IX halyqaralyq ǵylymı-tájirıbelik konferensııasynda aıtyldy.
– Jahandaný, tehnologııalyq ınnovasııalar, klımattyq, demografııalyq jáne basqa da ózgerister adamdar men qoǵam tıimdi ıkemdelýi tıis jańa talaptar qoıyp, jańa múmkindikterge jol ashady. Álemniń ózgerýi – balalardyń ózgerýi. Qazirgi balalardyń ómiri týa tirshiligine dendep engen qýatty tehnologııalarǵa baılanysty burynǵy áleýmettik mańyzdy ınstıtýttardyń biri bolǵan aýlalardy joǵaltýdan bastalady. Olar áleýmettik jelilerde ózderine tán talqylarmen, ázilderimen, sóıleýimen ómir súre bastady, – dedi basqarma tóraıymy. Osy rette K.Shámshıdınova sarapshylar men pedagogtardyń aıtýynsha, búgingi balalardyń aldyńǵy býyndaǵy balalarǵa qaraǵanda kóp ózgergenin jetkizdi. Iаǵnı, qabyldaýy jyldamyraq, este saqtaýy azyraq, izdeý men tabýdy biletin, azdaǵan aqparattardy bólise alatyn, ortaǵa tez qosylatyn, oıyn batyl jetkizýge qoryqpaıtyn urpaq ósip keledi. Sondaı-aq olar áleýmettik jelilerde qalaı jaqsy tabys tabý týraly da jetik biledi. Osy ispetti ózgerister zamanynda mektepter oqýshylardy ómirge daıyndap úlgere me degen saýal týýy zańdylyq. Bul qoǵamnyń da, jumys berýshilerdiń de kókeıinde turǵan másele.
Osy sııaqty kúrdeli jáıtterdiń sheshimin izdeýdegi halyqaralyq zertteýlerdi tilge tıek etken Kúlásh Noǵataıqyzy zııatkerlik mektepterdiń maqsaty ózgeriske tez beıimdelýge qabiletti tulǵa tárbıeleý ekenin aıtty. Qazirgi kezde zııatkerlik mektepterde negizgi bilim berý baǵdarlamasy qosymsha elektıvti kýrstarmen jáne sabaqtan tys tárbıe sharalarymen tolyqtyrylǵan. Bul oraıda «Týǵan elge – taǵzym», «100 kúıdiń tarıhy», «Eki apta aýylda», «Qazaq ánderi» syndy jobalar sátimen júzege asyrylýda. Osy jobalar aıasynda ólketaný ekspedısııalary uıymdastyrylyp, bes jylda 20-ǵa jýyq marshrýt boıynsha tarıhı-tanymdyq zertteý jumystary júrgizildi. Oqýshylar 300-ge jýyq tarıhı nysandarmen tanysty. Onyń ishinde kóne arheologııalyq muralar, óndiristik kásiporyndar men tabıǵı qoryqtar da bar.
Dýman ANASh,
«Egemen Qazaqstan»