Sonymen Semeı polıgonynan zardap shekken turǵyndar úshin paıdalanýǵa beriledi degen Iаdrolyq medısına ortalyq máselesi áli kúnge deıin naqty sheshilmeı jatyr.
Oblys ákimi Danıal Ahmetovtiń Semeıge kelgen saparynda bul másele taǵy da kóterildi. Mundaǵy radıasııalyq suıyqtyqty saqtaıtyn, eldiń barlyǵyn shýlatyp otyrǵan jabdyq-qorap Shymkenttiń bir kásipornynda jasalǵan eken. Al joba boıynsha merdigerler bul qural-jabdyqty Germanııadan ákelemiz dep uıǵarsa kerek. Halyq úshin asa mańyzdy nysannyń áli kúnge deıin paıdalanýǵa berilmeı otyrǵandyǵyn oblys ákimi taǵy bir márte túsindirdi.
– Sot isi qaraǵan saıyn jańadan faktiler anyqtalý ústinde, − dedi oblys ákimi Danıal Ahmetov, − máselen, Shymkentte daıyndalǵan sapasyz jabdyq iske jaramsyz. Áý basta muny Germanııadan ákeledi dep sendirgen. Árıne, men túsinemin, halyq sharshady. Osymen on ret komıssııa qarady. Biraq taǵy bir naqty komıssııa qurý kerek dep oılaımyn. Meniń tapsyrmam boıynsha, osy kúrdeli problemany sheshýdiń birneshe joly qarastyrylyp otyr. Radıasııalyq qaldyqtardy jınap, saqtaıtyn jabdyqty aýystyrý kerek. О́ıtkeni sapasyz, sondyqtan senimsiz jabdyq. Munyń qaýipsizdigi radıologııalyq ortalyqta isteıtin medısına qyzmetkerleri men naýqastardyń densaýlyǵy úshin asa mańyzdy.
Danıal Ahmetovtyń aıtýynsha, osy jabdyqty qoıǵan merdiger kompanııanyń bul qyzmet túrine áý basta eshbir zańdy quqyǵy bolmaǵandyǵy anyqtalǵandyǵy jóninde sot sheshimi óz kúshine enipti.
– Merdigerler munda oıyna kelgen dúnıesin jasaǵan. Olardy eshkim qadaǵalamaǵan. Tipti bas merdigerdiń de, jabdyqty ornatqan qosalqy merdigerdiń de jumysyn eshkim qaramaǵan. Lısenzııalary bar ma, joq pa, ony teksergen eshkim joq. Aqyry mine, qalaı tekserese de, másele qaıta-qaıta basyna kelip tireledi. Áıtse de, biz bul nysandy paıdalanýǵa beremiz. Adamdar osynda emdeletin bolady, – dedi Danıal Ahmetov.
Raýshan NUǴMANBEK, jýrnalıst
SEMEI