Ulttyq mýzeı men koreı mádenıet ortalyǵynyń uıymdastyrýymen ashylǵan «Qazaqstan koreıleri» atty fotokórmege Qazaqstan jáne Koreıa Respýblıkalary arasyndaǵy dıplomatııalyq qarym-qatynasqa 25 jyl jáne de olardyń qazaq jerimen baılanystaryna 80 jyl tolý tarıhy arqaý etildi.
Sharanyń ashylý rásimine Koreıa Respýblıkasynyń Qazaqstandaǵy elshiliginiń hatshysy Te Ken Gen qatysyp, Koreıa prezıdenti Mýn Szy Inniń quttyqtaý hatyn oqydy. Ulttyq mýzeıdiń dırektory mindetin atqarýshy Leonıd Kochetov: «Munda elimizde turaqtaǵan koreılerdiń qazirgi turmys-tirshiligi jan-jaqty baıandalady. Negizinen Astana, Almaty, Qyzylorda, Úshtóbe qalalaryndaǵy koreılerdiń sýretteri toptastyrylǵan Ulttyq mýzeıdegi fotokórme eshkimdi de beı-jaı qaldyrmasy anyq. Aldaǵy ýaqytta eki el arasyndaǵy mádenı jáne mýzeı salasyndaǵy yntymaqtastyq qarym-qatynastar barynsha jandana túsetinine senimdimin», – dep tilek bildirdi.
Kórmege qatysýshy, Parlament Májilisiniń depýtaty Roman Kım:
– Bıylǵy jyl qazaqstandyq koreıler úshin aıtýly jyl bolǵaly tur. Sebebi qazaq jerine koreılerdiń qonystanǵanyna 80 jyl tolady, sonymen qatar eki el arasyndaǵy dıplomatııalyq qarym-qatynastyń ornaǵanyna – 25 jyl. Osydan 80 jyl buryn taǵdyrdyń aıdaýymen Qazaqstanǵa tabandary tıgen koreıler jergilikti halyqtyń qamqorlyǵynyń arqasynda zulmat jyldar zobalańynan aman qaldy. Ash-jalańash, úısiz-kúısiz kelgen olardy qazaqtar jatsynbaı baýyryna tartyp, qoldarynan kelgenshe jaqsylyq jasady. Mundaǵy barsha koreı qaýymy qazaq halqynyń qoldaýyna rızashylyq sezimderin bildiredi, – dedi.
8 qarashaǵa deıin jalǵasatyn fotokórmege koreıalyq fotosýretshi Kım Djınsoktyń 1937 jylǵy májbúrlep kóshirý saıasaty saldarynan Qazaqstanǵa qonys aýdarǵan koreılerdiń qazirgi urpaqtarynyń kúndelikti ómir-tirshiligin beıneleıtin dúnıeler qoıylyp, tanystyryldy.
Qazaqstan aýmaǵynda ómir súrip jatqan koreılerdiń taǵdyry men tarıhynan fotoderekter jınaý maqsatyndaǵy bul fotojobasyn ázirleýge koreı mádenıet ortalyǵynyń bastamasymen Kım Djınsok 2016 jyldan bastap kirisken bolatyn.
Qazaqstandaǵy etnıkalyq koreılerdiń portretterinen bólek, Kım Djınsoktyń jumystarynda búgingi Qazaqstannyń da jarqyn qyrlary qaltarysta qalmaıdy: qalalyq peızajdar, tabıǵı landshaftar jáne qarapaıym adamdardyń ómiri sheberlikpen úılestirilgen.
Kım Djınsok fotokórmesi nesimen erekshelenedi, ne úshin bul jobaǵa onyń sýretteri attaı qalanyp tańdalǵan, bolmasa biz ol týraly ne bilemiz desek, bul esim Koreıa Respýblıkasyna áıgili fotojýrnalıst retinde málim. Álem elderine saıahat jasaı júrip ol Koreıadaǵy Chedjý aralyndaǵy «Olle», Ispanııadaǵy El Kamıno de Santıago qajylyq jolyndaǵy, Nepaldaǵy Gımalaı, Parıjdegi fransýz-shveısarlyq Monblan baǵytyndaǵy jaıaý júrginshiler saıahatyna qatysqan. Ol óziniń barlyq saparlary kezinde adamdardyń ómirlerindegi eń kórkem sátterdi óz obektıvine syıdyrta alýymen áriptesteri arasynda asa qurmetke ıe. Onyń der kezinde dáldikpen fotoapparat núktesin basa bilýi arqyly dúnıege kelgen týyndylary Koreıa kórmelerine qoıylǵan. Fotograftyń ózi qarapaıym adamdarmen aradaǵy tyǵyz qarym-qatynasty joǵary baǵalaıdy, adamdardyń tek bastarynan keshken hıkaıalardy tyńdap qana qoımaıdy, sonymen qatar tarıhı sátterdi apparatyna basyp úlgeredi. Fotosheber kıno óneri salasyna da edáýir ter tógipti, jáne kóptegen ýnıversıtetterde fotoóner týraly taǵylymdy leksııalar oqyǵan. Qazirgi tańda ol Koreıa Respýblıkasy Prezıdenti «Chonhvade» ákimshiliginiń fotografy.
Qarashash TOQSANBAI, «Egemen Qazaqstan»