Qyzylordada turǵyn úıleri apatty dep tanylǵan otbasylarǵa jańadan salynǵan 305 páterlik 6 kópqabatty úı paıdalanýǵa berildi. Baspanaly bolǵandardyń ishinde zeınetkerler, jas jáne kópbalaly otbasylar men jumyssyzdar da bar.
Oblys ákimi Q.Kósherbaev páter ıelerine kiltterin tabystap, turǵyndardy qonys toıymen quttyqtady.
«Biz memlekettik baǵdarlamalar aıasynda salynǵan úılermen qatar, jyl saıyn apattyq jaǵdaıdaǵy úılerdiń máselesin de kezeń-kezeńimen sheship kelemiz. Buǵan deıin apatty dep tanylǵan úılerdiń ornyna 204 páterlik 4 kópqabatty turǵyn úı paıdalanýǵa berilgen bolatyn. Búgin osy ıgilikti isterdiń jalǵasy retinde Jappasbaı batyr kóshesi men Tıtov qystaǵyndaǵy jańa móltek aýdanda 305 páterlik 6 kópqabatty turǵyn úıdiń kiltin saltanatty túrde tabystaǵaly turmyz. Nátıjesinde bıyl qaladaǵy apattyq jaǵdaıdaǵy turǵyn úılerdiń máselesi tolyǵymen sheshimin tapty dep aıtýymyzǵa bolady. Osy ıgi isterdiń barlyǵy - Ult Kóshbasshysy Nursultan Ábishuly Nazarbaevtyń syndarly saıasatynyń arqasynda qol jetkizip otyrǵan eń basty jetistigimiz. «О́z úıim – óleń tósegim» dep, basynda jeke baspanasy bolýyn armandamaıtyn adam joq. Úıli bolsa, ishi janǵa tolsa eken deıdi. Búgin Sizder sol armandaryńyzǵa qol jetkizdińizder, endi ishi sábıdiń kúmis kúlkisine tolsyn deımiz», - dedi oblys ákimi.
Jańa qonysqa qol jetkizgen turǵyndar rızashylyqtaryn bildirip, oblys basshysyna alǵystaryn jetkizdi.
Aıta ketýimiz kerek, 2013 jyly Qyzylorda qalasynda 300-ge jýyq otbasy turatyn 25 apatty úı bolǵan. Bul máseleni sheshý úshin 6 kóppáterli turǵyn úıdiń jobalyq-smetalyq qujattamasy ázirlenip, ótken jyldary onyń 4-eýi paıdalanýǵa berildi. Sońǵy 4 jylda Qyzylorda qalasynda 14 shaǵyn aýdan boı túzep, tek osy jyldyń ózinde 61 kópqabatty úıdiń 24-i paıdalanýǵa berildi. Al sońǵy 4,5 jylda óńirdegi qurylys kólemi 3,5 esege, oblys ortalyǵynda 8 esege artty.