Parlament Senatynyń Tóraǵasy Qasym-Jomart Toqaev «Bolashaqtaǵy bilim berýge arnalǵan qundylyqtar, ıgilikter jáne ınnovasııalar» halyqaralyq ǵylymı-tájirıbelik konferensııaǵa qatysý úshin Qazaqstanǵa kelgen bilim berý salasyndaǵy belgili fın zertteýshisi ári sarapshysy Pası Salbergti qabyldady, dep habarlady Qazaqstan Respýblıkasy Parlamenti Senatynyń Baspasóz qyzmeti.
Júzdesýshiler bilim berý jáne ǵylymnyń básekege qabilettiligin arttyrý, adam kapıtalyn damytý máselelerin talqylady.
Joǵarǵy Palatanyń basshysy Senatta ótken orta bilim berý júıesin zańnamalyq turǵyda retteýdiń ózekti máseleleri men keleshegine arnalǵan parlamenttik tyńdaý týraly habardar etti.
Q.Toqaev ǵylymı jetistikterge, oqytýdyń ınnovasııalyq ádisterine jáne muǵalimderdiń joǵary biliktiligine negizdelgen fınniń bilim berý júıesiniń tıimdiligin atap ótti. Tóraǵanyń aıtýynsha, Qazaqstan álemdik bilim berý keńistiginde keńinen tanylǵan fın tájirıbesin zertteýge jáne paıdalanýǵa múddeli. Qazaqstandy keleshekke bastaıtyn asa zerdeli balalardy oqytýǵa jaqsy jaǵdaı jasalǵan zııatkerlik mektepteriniń qyzmeti osy maqsatqa qol jetkizýge arnalǵan. Sonymen birge, búkil elimizde bastaýysh jáne orta bilim berýdiń biryńǵaı standarttaryn jasaý mindeti qoıyldy. Muǵalimderdiń eńbekaqysyn kóterý máselesi mańyzdy bolyp qalyp otyr.
P.Salberg Q.Toqaevtyń pikirimen kelise otyryp, ony sapaly bilim berý ortasyn jasaý baǵdarlamasymen tanystyrdy. Bilim berý júıesindegi biryńǵaı standarttar, oqýshylardyń ál-aýqaty jáne olardyń bilim alý isine belsendi qatysýy osy baǵdarlamany ázirleýdiń negizgi ustanymdary bolyp belgilengen.