«Astana» fýtbol komandasynyń bas bapkeri Stanımır Stoılov Qazaqstan premer-lıgasynyń HHHII týry aıasynda Almatynyń «Qaıratyna» qarsy oıynnan keıin baspasóz konferensııasyn ótkizdi.
- Biz búgin josparymyzdy tolyqtaı oryndap, chempıondyqty sheship qoıýdy oılap edik. Biraq qolymyzdan kelmedi, josparymyzdy oryndaı almadyq. Oıynshylarym úlken qysymnyń astynda oınady. Olarǵa senimdilik jetispegeni kórinip turdy.. Al standartty jaǵdaıdan gol jiberýimiz... ókinishti-aq. Birinshi gol soǵylǵannan keıin óz oıynymyzdy joǵaltyp aldyq.
- Alda «Makkabıge» qarsy mańyzdy oıyn kútip tur. Logvınenkonyń jaǵdaıy týraly pikir bildirseńiz.
- Ol murnyn syndyryp alǵan sııaqty. Aldaǵy eki oıynǵa qatysa almaıtyny anyq.
- Bıyl «Qaıratqa» qarsy tórt oıynnyń úsheýinde jeńilip qaldyńyzdar. Almatynyń komandasyn jeńýge ne jetpeıdi?
- Buryn «Qaıratty» jeńý kerek bolsa, jeńetin edik. Búgin qolymyzdan kelmedi. Bul joly bizge senimdilik jetispegeni anyq. О́z kezeginde «Qaırat» ta gol soqqanǵa deıin aıtarlyqtaı qaýip týdyrmady. Búgingi jeńilisimizdi óz moınyma alamyn. Durys sheshim qabyldamaǵan sekildimin. 0:0 kezinde oıyn teń dárejede júrip jatqan. Eshkimniń basymdyǵy bilinbegen edi.
- «Qaırat» oıyn sońyna taman qarqynyn kúsheıtti...
- Taǵy da qaıtalap aıtaıyn, birinshi goldan keıin biz óz-ózimizdi joǵaltyp aldyq. Osynyń saldarynan uıymshyldyǵymyz da joǵaldy. Al ary qaraı... Mine, osydan keıin «Qaırattyń» da oıyny kúsheıip ketti.
- Shymkentke ekinshi quramdy aparyp, asyǵys sheshim qabyldadym dep oılamaısyz ba?
- Biz birinshi qurammen de jeńilip qalýymyz múmkin edik. Josparymyz basqa edi. Endi sońǵy týrdaǵy «Aqjaıyqty» oılaýymyz kerek. Eger sońǵy týrada jeńiske jetsek osyǵan deıingi qurǵan josparymyzdyń durys bolǵany. Al eger keri jaǵdaı bolyp jatsa jyl boıǵy alǵa qoıǵan strategııamyzdyń durys bolmaǵany. «Aqjaıyqty» jeńý úshin qolymyzdan kelgenniń bárin jasaımyz.
- «Makkabıge» qarsy negizgi quramdy aparsyz ba, álde «Atletıkomen» ótken oıyn sekildi basty oıynshylaryńyzǵa demalys berip, «Aqjaıyqty» oılaısyz ba?
- «Qaıratpen» oıyn jańa ǵana aıaqtaldy. Qazir ol týraly áli oılanbadym. Jyldam sheshim qabyldaý qıyn. Eki oıyndy da joǵary deńgeıde aıaqtaýǵa tyrysamyz. Sondaı-aq kóp nárse oıynshylardyń jaǵdaıyna da baılanysty bolmaq.
Aıan ÁBDÝÁLI, «Egemen Qazaqstan»