Egemendikter óz oqyrmandarymen shyǵarmashylyq baılanys jasaýdy udaıy basty nazarda ustap keledi. Bul ıgi dástúr búgin Almatyda jalǵasyn tapty.
«Egemen Qazaqstan» gazetiniń basshylyǵy zııaly qaýym ókilderimen birge Almaty qalasyndaǵy Qońyr Mandokı atyndaǵy №154 jalpy bilim beretin mektep ujymymen kezdesti.
Esimi kúlli túrki álemine keńinen tanymal, qazaq tiliniń janashyry, Eýropanyń XX ǵasyrdaǵy asa iri ǵalymy Mandokı Ishtvan Qońyrdyń esimimen atalatyn bilim shańyraǵynda ótken keleli kezdesý mektep ustazdary men jas shákirtterdi úlken áserge bóledi. Kezdesýge «Egemen Qazaqstan» gazeti AQ Basqarma Tóraǵasy Darhan Qydyráli, basylymnyń Almatydaǵy tilshiler qosynynyń meńgerýshisi Nurǵalı Oraz, Vengrııanyń Almatydaǵy bas konsýly Ferens Blaýmann, Qońyr Mandokıdyń jary Ońaısha Maqsumqyzy, Túrki Keńesi janyndaǵy Aqsaqaldar Keńesiniń múshesi, belgili ǵalym Ádil Ahmetov, Qyrǵyzstandaǵy Manas túrki ýnıversıtetiniń professory Qadyraly Qońqabaev, Baıtursynov atyndaǵy Til bilimi ınstıtýtynyń dırektory Erden Qajybek syndy birqatar zııaly qaýym ókilderi qatysty.
Basylym basshysy Darhan Qýandyquly kezdesýdiń mańyzdylyǵyna toqtala kelip, ǵasyrlyq tarıhy bar ata basylymda byltyrdan beri pedagogıka salasyna birden-bir basymdyq beretin bilim berý isiniń qyzmetkerlerine, ata-analar men oqýshylarǵa arnalǵan tájirıbe almasýdyń ortaq alańyna aınalǵan «Bilim» jáne «Tálim» betteriniń úzdiksiz shyǵyp kele jatqanyn tilge tıek etti. Bıylǵy oqý jylynan bastap mektepterge engizile bastaǵan jańa bilim berý júıesiniń artyqshylyqtary, bilikti ustazdardyń tyń tájirıbeleri men tanymdyq materıaldary, bilim berýdiń jańartylǵan mazmunyna saı zerdeli zertteýler, atqarylyp jatqan basqa da kóptegen ıgi sharýalardyń gazet betinde úzdiksiz kórinis taýyp jatqanyn, bul óz kezeginde, el damýynyń negizgi kúshteriniń biri sanalatyn jalpy orta bilim berý salasyna, ustazdar qaýymyna basylym tarapynan kórsetilip otyrǵan qoldaý ekenin aıtty.
Sonymen birge atalǵan bilim shańyraǵynyń túrki dúnıesiniń tolaǵaı tulǵasy Mandokı Ishtvan Qońyrdyń atymen atalýynyń tegin emes ekenin, ol kisiniń qaıratkerlik joly jas urpaqqa úlgi ekendigin aıta kelip mektep ujymyna «Halyqaralyq túrki akademııasynda» jaryq kórgen sý jańa kitaptar serııasyn syıǵa tartty.
Alqaly basqosýǵa kelgen zııaly qaýym ókilderi memleket damýy úshin jastarymyzdyń jan-jaqty bilimdi zııatker urpaq bop qalyptasýy aza mańyzdy ekenin toqtalyp, jas shákirtter men mektep ujymyna tolaıym tabystar tiledi. Mektep ónerpazdarynyń myń buralǵan bıi men kúmbirlegen kúıi kezdesýge jıylǵan qonaqtardy qýanyshqa bólep, zamandastary tarapynan Qońyr Mandokı jaıly áserli estelikter aıtyldy.
Kezdesý sońynda atalǵan bilim shańyraǵynyń dırektory Qalamqas Almasbaeva zor qýanyshyn jetkizip, kelgen qonaqtarǵa alǵysyn bildirdi.
Arman OKTIаBR, «Egemen Qazaqstan» ALMATY