Astana qalasynda Din isteri jáne azamattyq qoǵam mınıstri Nurlan Ermekbaevtyń tóraǵalyǵymen din salasyndaǵy memlekettik saıasattyń qazirgi tańdaǵy negizgi basymdyqtary men basty mindetteri týraly jıyn ótti. Oǵan óńirlik din isteri basqarmalary men din problemalaryn zertteý ortalyqtarynyń basshylary qatysty.
Basqosýda vedomstvo basshysy baıandama jasap, halyq arasynda aqparattyq-túsindirý jumystaryn júrgizýdiń tıimdiligin arttyrý qazirgi tańdaǵy mańyzdy máselelerdiń biri ekenine nazar aýdardy.
«Áleýmettik zertteýlerdiń nátıjelerine súıensek, arnaıy saýalnamaǵa jaýap berýshilerdiń 30 paıyzy jergilikti jerde júrgizilip jatqan aqparattyq-túsindirý, ásirese jastar arasyndaǵy jumystardyń tıimdiligin jetkiliksiz dep baǵalady. Sondyqtan memlekettik-konfessııalyq qatynastardy nyǵaıtý, memlekettiń zaıyrly qaǵıdattaryn jyljytý jáne dindi destrýktıvti maqsatta paıdalanýǵa jol bermeý úshin ortalyq jáne óńirlik atqarýshy organdardyń, azamattyq qoǵam ınstıtýttarynyń birlesken kúsh-jigerin shoǵyrlandyrý qajet», dedi mınıstr.
Onyń pikirinshe, halyqtyń maqsatty toby arasynda Din salasyndaǵy memlekettik saıasattyń 2017-2020 jyldarǵa arnalǵan tujyrymdamasynyń negizgi erejelerin jáne qoldanystaǵy zańnamanyń normalaryn keńinen túsindirý qajet.
N.Ermekbaev jıynǵa qatysýshylarǵa aldyn alý jáne ataýly jumystardy uıymdastyrý barysynda kelisilgen jáne birizdilendirilgen tásilderdi ázirleýdi tapsyrdy. Jastardyń uıymdaspaǵan toby arasynda jumystardy kúsheıtip, is-sharalarǵa olardyń qyzyǵýshylyqtaryn arttyrý, ınnovasııalyq ádis-tásilderdi qoldaný qajet.
Ashat RAIQUL,
«Egemen Qazaqstan»