Parlament Senaty Halyqaralyq qatynastar, qorǵanys jáne qaýipsizdik komıtetiniń tóraǵasy Darıǵa Nazarbaeva Reseı Memlekettik Dýmasy Qorǵanys komıtetiniń tóraǵasy Vladımır Shamanovpen jáne Memlekettik Dýmanyń TMD isteri, eýrazııalyq ıntegrasııa jáne otandastarmen baılanys iteri jónindegi komıtet tóraǵasynyń birinshi orynbasary Konstantın Zatýlınmen kezdesti. Bul týraly Senattyń baspasóz qyzmeti habarlady.
D.Nazarbaeva Qazaqstan men Reseıdiń tatý kórshilik qatynastaryn nyǵaıtýda parlamentaralyq baılanystar negizgi máselelerdiń biri ekenin atap ótti. Senator TMD jáne UQShU Parlamentaralyq Assambleıalary sekildi alańdarda ózara parlamentaralyq is-qımyldy odan ári nyǵaıtý jaıynda aıtty.
V.Shamanov Qazaqstan Prezıdenti N.Nazarbaevtyń Sırııadaǵy shıelenisti retteýge qosqan zor úlesin atap ótti.
«Astanadaǵy kelissózder aıasynda qol jetken jetistikter onyń mańyzdylyǵyn dáleldedi. Oǵan qosa, Astana halyqaralyq shıelenisterdi sheshýdegi álemdik ortalyqtardyń birine aınaldy», dedi ol.
Senator óz kezeginde Sırııadaǵy jaǵdaıdy turaqtandyrý men DAISh jáne basqa da terrorshyl toptardyń áskerı jáne qarjylaı áleýetin joıýdaǵy Reseıdiń erekshe rólin tilge tıek etti.
«Qazaqstan budan bylaı da Sırııadaǵy teketiresti beıbit retteýge járdemdesýge, onyń ishinde Astanada sırııaaralyq kelissózderdi júrgizýge barlyq qajetti jaǵdaıdy jasaýǵa ázir», dedi D.Nazarbaeva.
Áńgime barysynda Reseı depýtattary Memlekettik Dýmadaǵy zań shyǵarý qyzmeti, sondaı-aq shekara mańaıyndaǵy yntymaqtastyqty nyǵaıtý jónindegi jumystar barysy týraly D.Nazarbaevany habardar etti.
Kezdesý aıasynda halyqaralyq kún tártibiniń basqa da mańyzdy salalary, atap aıtqanda, ıadrolyq taqyrypqa qatysty Irandaǵy ózekti máseleler men Aýǵanstandaǵy ahýaldy turaqtandyrý jaıy da talqylandy.