Eldigimiz ben egemendigimizdi aıqyndaıdy

«Latyn álipbıine kóshsek, jaǵdaıymyz qalaı bolady?» degen kúdik-kúmándi sylyp tastap, zamana talabyn oryndaýǵa árqaısysynyń ázir ekenin bildirýi kóńilge senim uıalata túskendeı. Almaty qalasyndaǵy aıtary bar azamattar da bas qosyp, álipbıge baılanysty oıymen bólisip, jańǵyrýǵa bastaıtyn jańa jazýymyzdy qoldaýǵa shaqyrdy.

Tóregeldi ShARMANOV,  Qazaq tamaqtaný akademııasynyń prezıdenti: – Elbasy latyn álipbıine ótý týraly Jarlyqqa qol qoıa otyryp, bolashaqqa úlken ári naqty qadam jasap otyr. Bul bizdiń, ultymyzdyń rýhanı kodeksi desek te bolady. Elbasynyń bul bastamasynyń máni zor, órkenıetti elderdiń kóshine ilesý úshin kerekti qadam, maqtanatyn nárse. Latyn ol qazirgi jańa tehnologııanyń, ǵylymnyń, tipti ádebıettiń tili. Osy bastamany Nursultan Ábishuly qoldap otyrǵanyna qýanyshtymyn.

Shámsha BERKIMBAEVA, burynǵy Bilim jáne ǵylym mınıstri:  – Latyn álipbıine kóshý úlken daıyndyqty, jan-jaq­tylyqty qajet etetin jumys. Sol sebepti de uzaq ýaqyt halyq­tyń talqylaýynan ótip, túrli ǵalymdar men til ma­man­dary bul jumysqa jumyl­dyryldy. Osy ótkizilgen jumystardyń nátıjesi retinde Elbasymyz Jarlyqqa qol qoıyp, halyq nazaryna sońǵy nusqany usyndy. Osyǵan oraı Elbasymyzdy, elimizdi osynaý jańa qadammen quttyqtaımyn. Endigi másele halyqty aqparattandyrý, olardyń arasynda túsindirý jumystaryn júrgizý bolyp otyr. 

Jadyra DÁRIBAEVA,  aqyn:  – Men Elbasynyń Jarly­ǵyn qoldaımyn, tolyq kelise­min. Sebebi latyn qarpine kóshý­diń ýaqyty keldi. El bolyp, halyq bolyp talqylaýǵa qa­tys­tyq. Sondyqtan qazaq álip­bıin latyn qarpine kóshirý der kezinde qabyldanǵan she­shim. Bizdiń qarqyndy damyp kele jatqan memle­keti­­miz úshin zaman aǵymymen qatar júrý – basty mindetterdiń biri. Qazaq tili óte baı til, al latyn álipbıine kóshý ar­qy­ly biz sony kórsete alamyz dep oılaımyn.  Sonymen qatar ózge halyqtarmen, sonyń ishinde týystas túrki halyqtarymen etene aralasýymyzǵa jol ashylǵan sekildi. Osy jasaǵan qadamnan biz jaqsylyq bolmasa, jamandyq kórmeımiz.

Altynbek QORAZBAEV,  kompozıtor, Memlekettik syılyqtyń laýreaty: – Elbasynyń latyn álip­bıine kóshý týraly Jar­ly­ǵy biz úshin qýanyshty jańa­lyq bolyp otyr. Biz buǵan deıin de latyn qarpine kóshýi­miz kerek edi, áli de bolsa kesh emes. Osy turǵyda bul der kezinde qa­byldanǵan sheshim. Bizge bolmasa da balalarymyzǵa, keıingi urpaqqa latyn qarpi óte qajet dúnıe. Latyn álipbıiniń nusqasyn daıyndaý jáne bekitýdi kóp sozbaı, tııanaqty jumys atqarylǵany qýantarlyq jaǵdaı.

Aıagúl MIRAZOVA,  Qazaqstannyń Eńbek Eri: – Elbasymyz kópten beri talqyǵa túsip otyrǵan qazaq álipbıin latyn qarpine kóshi­rýge baılanysty sheshimge qol qoıdy. Dúnıe júzindegi halyq­tardyń 70 %-y latyn qarpi­ne kóshkeni belgili. Sol sebepten bul bizge qajet dúnıe. Elba­sy­myzdyń ózi búkil qazaq halqynyń til birligin saq­taýymyz kerek dep aıtyp júr. Qazaqtardyń úshten bir bóligi shetelderde deıtin bolsaq, bárimizdiń basymyzdy til ǵana biriktire alady. Tilde birlik bolmasa, ulttyq biregeılik bolmaıdy. Osy turǵyda túrli ǵalymdarymyzdyń, til mamandarynyń, qoǵam qaıratkerleriniń, taǵy da basqa kóptegen tulǵalardyń pikir bildirip, qoldaýy elimizdiń keleshegine beı-bereket qaramaǵandyǵy dep qýanamyn. Qazirdiń ózinde elimiz álem kóshimen qatar damý ústinde. Halyq­aralyq deńgeıde EKSPO kórmesin ótkizýimizdiń ózi mem­le­ke­ti­mizdiń qýattylyǵyn kórsetse, latyn qarpine kóshýimiz sony nyǵaıta túsedi dep oılaımyn.

ALMATY