Ortalyq kommýnıkasııalar qyzmetinde Ulttyq ekonomıka mınıstrligi Kásipkerlikti damytý departamentiniń dırektory Ǵalııa Joldybaevanyń qatysýymen Dúnıejúzilik banktiń «Doing Business 2018» reıtınginiń qorytyndysyna arnalǵan baspasóz máslıhaty ótti.
«31 qazan kúni Dúnıejúzilik bank óziniń ár jyly ótkizetin «Doing Business» reıtınginiń bıylǵy esebin jarııalady. Aǵymdaǵy jyly Qazaqstan 36-orynǵa ıe bolyp otyr, ótken jyly 35-oryn bolatyn. «Doing Business 2018» baıandamasy kásipkerlik qyzmetti keńeıtýge yqpal etetin jáne ony shekteıtin normalarǵa baǵalaý júrgizetin Dúnıejúzilik bank tobynyń jyl saıynǵy basylymynyń serııasyndaǵy 15-shyǵarylym bolyp tabylady. Atalǵan zertteýde 10 ındıkator boıynsha 190 eldegi bıznes-ahýaldyń qolaılylyǵy deńgeıin salystyrýǵa múmkindik beretin sandyq kórsetkishter qoldanylyp otyr. Qazaqstan reıtıngte Italııa (46), Belgııa (52), Izraıl (54), Grekııa (67), Túrkııa (60) sııaqty EYDU-nyń elderin basyp ozdy. EAEO Keden odaǵy elderiniń arasynda Qazaqstan reıtıngte Belorýssııa (38), Moldova (44), Armenııa (47), Qyrǵyzstan (77) elderinen alda tur. Sonymen qatar elimiz «Mınorıtarly ınvestorlardy qorǵaý» ındıkatory reıtınginde 190 eldiń ishinde 1-orynǵa taban tiredi. Al «Kelisimsharttardy oryndaý» ındıkatoryndaǵy 6-orynmen Qazaqstan eki jyl boıy alǵashqy on úzdik elder qatarynda ornalasty. «Menshikti tirkeý» ındıkatory boıynsha 17-orynda. «Tólem qabiletsizdigin sheshý» ındıkatorlary boıynsha 39-oryn, «Kásiporyndardy tirkeý» 41-oryn, «Salyq salý» 50-oryn, «Qurylysqa ruqsat alý» 52-oryn, «Elektr jelilerine qosylý» 70-oryn, «Nesıe alý» 77-oryn, «Halyqaralyq saýda» boıynsha 123-orynǵa turaqtady», dedi departament dırektory.
Raýan QAIDAR, «Egemen Qazaqstan»