ÝEFA Eýropa lıgasy toptyq kezeńiniń 4-týr aıasynda «Makkabı» men «Astana» komandalary arasyndaǵy match aıaqtaldy.
Birden aıtaıyq, bul keshte osydan eki apta buryn «Astana Arenada» oısyraı jeńilgen «Makkabıdiń» birde-bir nyshany joq. Kerisinshe, á degennen-aq alań ıeleriniń basymdyqtary anyq baıqalyp turdy. Tipti, esepti birinshi bolyp ashyp, jankúıerlerin bir qýantyp tastady.
Kezdesýdiń alǵashqy mınýttarynan-aq alań ıeleriniń basymdyǵy baıqalyp tur. Tipti, esepti birinshi bolyp asha jazdady. Oıynnyń 3-mınýtynda Vıdar Kıartanson alańnyń orta tusynan qaqpaǵa qaraı tepkenimen, bul jerde Nenad Erıch tosqaýyl qoıa bildi. Al buryshtamadan berilgen dopty ádemi qabyldaǵan Jan-Sılven Babenniń joly bolmady. Abyroı bolǵanda ol qaqpadan bıik tepti.
Bul matchta osydan birer kún buryn «Astana» – «Qaırat» arasyndaǵy oıynda jaraqat alǵan Iýrıı Logvınenkonyń joqtyǵy bilinip-aq turdy. О́ıtkeni, «Makkabıdiń» shabýyly kóbine alańnyń orta tusynan jasaldy. Áıtkenmen, bizdiń jigitter de qarap qalmaı, shama-sharqy kelgende shabýyl bastap kórgisi kelip-aq júrdi. Biraq, oǵan alań ıeleri múmkindik bermedi. Úziliste taktıkany ózgertpese ızraıldikter kózdegen maqsatyna qol jetkizetinin bilgen S.Stoılov ekinshi taımda múldem basqa oıynshylardy alyp shyqqandaı.
Úzilisten keıin jerlesterimizdiń oıyny 180 gradýsqa ózgerip shyǵa keldi. Ýaqyt uzaǵan saıyn S.Stoılov shákirtteri ekinshi kezeńde Raıkovıch qorǵaǵan qaqpa jaqqa qysymdy kúsheıte tústi. Sonyń nátıjesinde Kezdesýdiń 57-mınýtynda Abzal Beısebekovtyń oń qaptaldan bergen pasyn ádemi paıdalanǵan Patrık Tvýması esh qınalmastan qaqpaǵa daryta aldy. Jaraısyń, Gananyń qara domalaq balasy.
Osy goldan keıin Iordı Kroıf eki oıynshysyn, sál ýaqyt óte kele taǵy bir fýtbolshysyn almastyryp, taktıkaǵa ózgeris jasaǵysy kelgeni anyq edi. Alaıda, ol jospary oryndalmady. «Astana» soǵylǵan goldan keıin ara-tura shabýyl jasaǵanymen, kóbine qorǵanysqa jatyp alyp, qaqpalaryn kúzetýmen boldy. Eń bastysy, «Astana» 1:0 esebimen jeńiske jetti. Jeńis qutty bolsyn, aǵaıyn!
Almas MANAP, «Egemen Qazaqstan» – Natanııadan (Izraıl)