Parlament Senatynyń Tóraǵasy Qasym-Jomart Toqaev Eýrazııadaǵy evreı qaýymyn qoldaý ulttyq koalısııasynyń tóraǵasy Danıel Rýbın bastaǵan delegasııany qabyldady. Bul týraly Senattyń baspasóz qyzmeti habarlady.
Elimizdiń ınvestory ári ekonomıkalyq áriptesi qataryndaǵy AQSh-pen qatynastardy damytýǵa Astana erekshe nazar aýdaratyndyǵyn atap ótken Q.Toqaev kópsalaly ózara is-qımyldy nyǵaıtýda prezıdentterdiń syndarly únqatysýy zor mańyzǵa ıe ekenin alǵa tartty. Senat Tóraǵasynyń aıtýynsha, Prezıdent N.Nazarbaevtyń AQSh-qa aldaǵy saparynyń erekshe máni bar.
Sondaı-aq Parlament joǵarǵy palatasynyń basshysy AQSh Kongresi men ózara is-qımyldy tereńdetý jáne parlamentaralyq yntymaqtastyq tetikterin nyǵaıtý jaıyn da sóz etti.
Saýda-ekonomıkalyq baılanystardy ulǵaıtý keleshegi týraly máseleni talqylaý barysynda Djekson-Venıktiń Qazaqstanǵa qatysty túzetýleriniń kúshin AQSh Kongresi joıýy qajettigi týraly ortaq pikirge keldi.
Q.Toqaev barlyq etnostyq jáne dinı toptardyń quqyqtary men zańdy múddelerin qorǵaýǵa baǵyttalǵan elimizde júzege asyrylǵan saıasat týraly amerıkalyq delegasııany habardar etip, Álemdik jáne dástúrli dinder kóshbasshylarynyń barlyq bes sezine ıýdaızm ókilderiniń belsendi qatysqanyn atap ótti.
D.Rýbın beıbitshil syrtqy saıasat júrgizýdegi jáne BUU Qaýipsizdik Keńesindegi nátıjeli jumysy úshin Qazaqstanǵa alǵys aıta otyryp, elimizdiń etnostyq, dinı jáne mádenı bostandyqtar máselelerinde búkil álem úshin úlgi bolyp otyrǵanyn jetkizdi.
Áńgime barysynda ıadrolyq qarýsyzdaný, jahandyq jáne aımaqtyq qaýipsizdik máselelerindegi Qazaqstannyń bastamalary da talqylandy.