Jitiqara qalasyndaǵy №2 orta mektep óziniń 90 jyldyq mereıtoıyn atap ótti. Oǵan mektep túlekteri, ardager ustazdar shaqyryldy.
Irgesi 1927 jyly qalanǵan mektepten osy ýaqytqa deıin 2 myńnan astam shákirt bilim alǵan. Solardyń alpystan astamy mektepti «Altyn medalǵa» bitirgen. Olardyń arasynda elimizge belgili, halqymyzdyń mereıin kóterip júrgen tulǵalar da bar. Máselen, Qazaqstannyń Fransııadaǵy elshisiniń keńesshisi Berlın Erishev, tehnıka ǵylymdarynyń doktory, professor, Ulttyq ınjenerııa akademııasynyń korrespondent-múshesi, Halyqaralyq ınjenerııa akademııasynyń akademıgi Abdrahman Begalınov, aqyn Aqylbek Shaıahmet, «Qazaqstannyń densaýlyq saqtaý úzdigi» tósbelgisiniń ıegeri Marııa Kenenbaeva sekildi tizimdi jalǵastyra berýge bolady.
Aýdan ákimi Abaı Ybyraev jınalǵandardy mekteptiń mereıtoıymen quttyqtady. «Bir ǵasyrǵa jýyq ýaqyt ishinde bilim uıasy kezdesken qıyndyqtardy jeńip, tabysyn eselep, búgingi kúni ýaqyt talabyna saı bilim beretin mektep dárejesine jetti. Bul mektep ujymynyń, ustazdardyń orasan eńbeginiń nátıjesi» dedi Abaı Sársenbaıuly.
Mekteptiń materıaldyq bazasy jyldan jylǵa jaqsaryp keledi. Mereıtoı aldynda Jitiqara aýdanyndaǵy «Qostanaı mıneraldary» aksıonerlik qoǵamy 23,5 mıllıon teńge qarajat bólip, mekteptiń barlyq terezelerin plastıkaǵa jańartyp berdi, sport zalyn jóndep, jaraqtandyrdy, 5 ınteraktıvti taqta alyp berdi. Mereıtoıǵa kelgen túlekter, qonaqtar bilim uıasynyń mýzeıin, synyptaryn aralap kórdi. Túlekter mýzeıge eskertkishter tabys etti. Mereke mektep oqýshylarynyń án-bıimen órnekteldi.
Názıra Járimbet,
«Egemen Qazqstan»
Qostanaı oblysy,
Jitiqara qalasy