Astana áýejaıyna Reseıdiń Taganrog qalasyndaǵy avıajóndeý zaýytynda kúrdeli jóndeý jumystary men jetildirýden ótken An-12 áskerı-kólik ushaǵy kelip qondy.
An-12 ushaǵy jeke quram (60-96 adam) men júkterdi (20 tonnaǵa deıin), Qarýly Kúshter men áskerı tehnıkany tasymaldaýǵa, arnaıy maqsattaǵy áskerlerdi parashıýtten túsirýge, áskerı-kólik avıasııa bólimderi men bólimsheleriniń jeke quramyn jaýyngerlik daıyndyqpen qamtamasyz etýge arnalǵan. Iаǵnı, ol Qazaqstan Respýblıkasy Qarýly Kúshterinde paıdalanylatyn orta býyndaǵy avıasııalyq tehnıka bolyp tabylady.
Kúrdeli jóndeý men tolyq jetildirýden ótken An-12 ushaǵyna Qazaqstannyń Áskerı-áýe kúshteri úshin halyqaralyq maıak boıynsha navıgasııa jáne otyrǵyzý júıesi, radıomaıakty radıoqashyqtyq, sýperradıostansa, meteolokator, bıiktik ólsheý, GPS stansasy sııaqty júıeler qondyrylǵan.
An-12 BP ushaǵyn kúrdeli jóndeýden ótken soń keminde alty jylǵa deıin erkin paıdalanýǵa bolady.
Oksana PARPÝRA.