Jýyrda Astanadaǵy Qazaqstan ortalyq konsert zalynda Qazaqstannyń eńbek sińirgen ártisi Nurlan О́nerbaı óziniń án keshin ótkizdi. «Ilıgaı dep án saldym» degen atpen ótken bul shyǵarmashylyq keshti ánshiniń úlken sahnaǵa alǵash shyqqan kenje uly Marǵulannyń óner jolyndaǵy alǵashqy tusaýkeseri dese de bolady.
Bir kezderi qońyr daýsymen kórermendi baýrap alǵan balań jigit búginde aıtýly ánshi ekeni ózimizge belgili desek, ónerde ózindik orny bar daryndy azamattyń bul keshi erekshe mazmundy ótti. Kópshilik súıikti ánshileriniń rýhanı ósý jolyna súısinip, ónerine sýsyndap qana qoıǵan joq. Ony búginde nemerelerine ardaqty ata, al uldaryna súıikti áke bolyp otyrǵan azamat retinde de tanydy. Iá, bul joly ol óner jolyna ózi baýlyǵan kenjesimen sahnaǵa birge shyqty. Sóıtip, bul keshte Marǵulan ákesin fortepıanoda súıemeldedi. Sondaı-aq nemeresi Ilıgaıdy qasıetti sahna tórine shyǵaryp, bul keshtiń mán-mańyzy týraly qyzyqty áńgime aıtty. Sóıtsek, bul «Ilıgaı» degen án onyń sahnaǵa alǵash shyqqanda salǵan áni eken. Kóńilge ystyq án keıinnen nemeresiniń esimine aınalypty.
Iá, tynymsyz eńbek pen tabıǵat bergen daryn arqasynda óner álemine ádemi ánder men tamasha dúnıelerdi ákelip, halaıyqty rıza etip júrgen ony búginde jurtshylyq halyq qalaýlysy retinde de jaqsy biledi. Alaıda ol án salýdan tosyrqap qalmaǵan eken, shyǵarmashylyq keshinde óziniń ánshi retinde babynda ekenin kórsetti. Sóıtip, ol óziniń burynnan tyńdarman júreginen myqtap oryn alǵan «Aıdaı», «Qaraǵym-aı», «Ilıgaı» jáne t.b. tanymal ánderin oryndady.
Venera TÚGELBAI.