Ulttyq akademııalyq kitaphanada «Qazaqstandyq ǵalym áıelder qoǵamy» birlestiginiń uıymdastyrýymen, Abaı atyndaǵy Qazaq ulttyq pedagogıkalyq ýnıversıtetiniń, M.Áýezov atyndaǵy Ońtústik Qazaqstan memlekettik ýnıversıtetiniń, L.N.Gýmılev atyndaǵy Eýrazııa ulttyq ýnıversıtetiniń qoldaýymen ǵalym áıelderdiń forýmy ótti.
«Qazaqstandyq ǵalym áıelder qoǵamy» – elimizdegi 400 myńǵa jýyq ǵalym áıelderdiń múddesin qorǵap, eldegi túrli máseleler boıynsha azamattyq ustanymdaryn kórsetý úshin qurylǵan birlestik. Byltyr qurylǵan qoǵamdyq birlestiktiń mańyna elimizdegi túrli sala boıynsha tanymal qaıratker hám ǵalym áıelder toptastyrylǵan.
Ulttyq akademııalyq kitaphanada ótkizilgen ǵalym áıelderdiń forýmy dóńgelek ústel formatynda uıymdastyrylyp, onda elimizdiń latyn álipbıine kóshýdiń ádistemelik jaǵy talqylandy. Sharany júrgizgen «Qazaqstandyq ǵalym áıelder qoǵamy» birlestiginiń prezıdenti Tańat Aıapova eń aldymen forýmnyń mán-mańyzyna toqtalyp, latyn álipbıi týraly oı-pikirlerin ortaǵa saldy. «Biz Qazaqstannyń ǵalym áıelderi Elbasynyń latyn álipbıine kóshý týraly shyǵarǵan Jarlyǵyn biraýyzdan qoldaımyz. Latyn álipbıine kóshý týraly ıdeıa dál ýaqytynda aıtyldy. Bul tarıhı mańyzdy sheshim. Bolashaqta damyǵan otyz eldiń qataryna kirýdi maqsat etip otyrǵandyqtan, ol elderdiń kóbiniń jazýy latyn álipbıimen jazylatynyn da eskergen jón. Biz búgin latyn álipbıine kóshýdi emes, latyn álipbıine tezirek kóshý úshin qandaı ádisteme usynamyz, latyn álipbıin kópshilik kókeıine qondyrý úshin qalaı nasıhattaımyz degen maqsatta jıylyp otyrmyz», dedi ol.
Forým barysynda belgili pedagog, Qazaqstannyń Eńbek Eri Aıagúl Mırazova quttyqtaý sóz sóıledi. Ol óz sózinde elimiz ekonomıkalyq turaqtylyǵy men qýattylyǵynyń arqasynda úshinshi jańǵyrýǵa qadam basqanyn atap ótip, qoǵam damýynyń ár kezeńinde túrli salalardyń alǵa shyǵyp otyrýyn tabıǵı zańdylyq retinde kórsetti. «Elbasynyń strategııalyq joldaýlary men maqalasynda qazaq jazýyn latyn grafıkasyna kóshirý satylap júzege asyrylatyny aıtylǵan. Tilimizdi damytý jáne álemdik aqparattyq keńistikke shyǵarý úshin latyn grafıkasy bizge aýadaı qajet ekenin qoǵamǵa, jalpy halyqqa túsindirý úshin zııaly qaýym ókilderi men qoǵam qaıratkerleri atsalysýda. Men til mamandaryna rızamyn, olar óte jaqsy belsendilik tanytty», dedi A.Mırazova.
Sharaǵa qatysqan ǵalymdardyń kópshiligi latyn álipbıin tez úıretýdiń joldaryn aıtyp, ádisteme jasaý jaıyna toqtaldy. Jıyn sońynda olar qazaq tili men aǵylshyn tilin sapaly úırený jaıy aıtylǵan úndeý qabyldady. Úndeýde latyn álipbıine kóshý reformasy arqyly elimizdiń álemdik qoǵamdastyqta óz ornyn bekite alatyny, bul elimizge úlken jetistikter syılaıtyny, HHI ǵasyrda damýdyń jańa satysyna aıaq basqanymyzdy kórsetetini atap aıtylǵan.
Aıgúl SEIIL, «Egemen Qazaqstan»