HIII ulttyq Delfıı oıyndarynyń bıylǵy estafetasyn Qyzyljar óńiri qabyldap, ashylý saltanaty Pogodın atyndaǵy orys drama teatrynda «О́nerim – rýhanı qazynam» degen atpen ótti. Ony ulttyq delfıılik komıtet uıymdastyryp, oblystyq ákimdik jan-jaqty qoldaý kórsetti.
Halyqaralyq delfıı komıtetiniń dırektory Vladımır Ponıavın ejelgi grek jerinen bastaý alǵan qozǵalys Qazaqstanda da keń qanat jaıǵanyn, halyqaralyq mártebe alǵaly aýqymy keńeıip, sapalyq mazmuny artqanyn tilge tıek etti. Ulttyq delfıı korporatıvtik qorynyń jetekshisi, joba úılestirýshisi Quralaı Túsipekova saıysqa oblystar men Almaty jáne Astana qalalarynan 600-ge jýyq qatysýshynyń tartylǵanyn, fortepıano, ulttyq aspaptar, teatr, halyq, akademııalyq, estradalyq ánder oryndaý, fotosýret, telejýrnalıstıka, kıim dızaıny, dekoratıvti-qoldanbaly óner sekildi 18 atalym boıynsha básekege túsetinin alǵa tartty. Dodanyń ereksheligi sol, estý qabileti nashar balalar úshin «Horeografııa» jáne «Isharamen án aıtý» atalymdary engizilip, qatysýǵa 100-ge tarta úmitker ótinish bildirgen. Budan tysqary «Qolarbamen bıleý» atalymynyń tusaýy kesilmek.
Teatr aldyndaǵy alańda Delfıı oıyndarynyń týy kóterilip, alaýy jaǵylyp, ánurany shyrqaldy. Kórermender «Jeńisterge birge!» atty paralımpıadalyq bastamalar sheńberinde ótkizilgen «Qolarbada bıleý» atalymynyń jeńimpazdary Erlan Nurmaǵanbetov pen Sandýǵash Aqanovanyń juptyq bıine, belgili ánshiler Álı Oqapovtyń, Álisher Kárimovtiń áýelete shyrqaǵan ánderine dýyldata qol soqty.
Ár aımaqtan saıdyń tasyndaı iriktelip kelgen órender 10-15 jáne 16-21 jas aralyǵy boıynsha eki topqa bólinip, 12 mádenı orynda jarys kórigin qyzdyrdy. Mádenıet pen ónerdiń brendine aınalǵan jastar baıqaýy kóne klassıkadan bastap qazirgi ónerge deıin biriktirip, shynaıy sheberlik pen shalqar shabyt qatar órilip jatty.
Jas talanttar men daryndardyń birneshe kúnge sozylǵan shyǵarmashylyq baıqaýynda jalpykomandalyq esepte Soltústik Qazaqstan oblysy qorjynǵa 9 altyn, 11 kúmis, 6 qola salyp, birinshi orynǵa ıe boldy. Ekinshi, úshinshi oryndardy Astana qalasy men Aqmola oblysy bólisti.
Jekelegen atalymdar boıynsha Dilnaz Tashmuhamed («Halyq ánderi», Qyzylorda oblysy), Bekzat Pirilepesov («Dombyra», Ońtústik Qazaqstan oblysy), Rystygúl Kósherova («Beıneleý óneri», Soltústik Qazaqstan oblysy), Mereı Yntymov («Kıim dızaıny», Astana) top jardy. Sol sııaqty «Telejýrnalıstıkadan» Nursultan Abbaz pen Qaldybaı Eleýov (Ońtústik Qazaqstan oblysy), «Qobyzdan» Gúlim Atosheva (Batys Qazaqstan oblysy), «Isharamen án aıtýdan» Elmıra Baltyqova (Almaty oblysy), «Horeografııadan» «Sensitive» bı toby (Petropavl qalasy) jeńimpaz dep tanyldy.
Jeńimpazdar men júldegerlerge arnaıy sertıfıkattar, syı-sııapattar tapsyrylyp, marapat sońy gala-konsertke jalǵasty.
О́ner, mádenı shyǵarmashylyq baıqaýynyń eń úzdikteri halyqaralyq Delfıı oıyndaryna joldama aldy.
О́mir ESQALI, «Egemen Qazaqstan»
Soltústik Qazaqstan oblysy