Din isteri jáne azamattyq qoǵam mınıstri Nurlan Ermekbaevtyń bastamasymen qurylǵan «Ýaqyp» korporatıvtik qaıyrymdylyq qorynan Qazaqstan musylmandary dinı basqarmasy О́skemen aımaǵynyń 11 ımamyna qaıyrymdylyq baǵytynda qarjylaı kómek kórsetildi.
Búgingi tańda «Ýaqyp» qory elimizdegi áleýmettik az qamtylǵan toptar men rýhanı sharalardy qoldap qarjylandyrýmen qatar, dinı qyzmetkerlerdiń áleýmettik jaǵdaıyn jaqsartýǵa da nazar aýdaryp otyr. «Qordyń qurylýy, ásirese asyl dinimizdi nasıhattaýda talmaı eńbek etip júrgen ımamdardyń áleýmettik máselesin jaqsartý jolynda ıgilikti qadam boldy. Din qyzmetkerleriniń halyqqa alańsyz qyzmet etýi úshin osyndaı izgi amaldardyń paıdasy zor» deıdi QMDB О́skemen aımaǵyndaǵy ókil ımamy Ermek qajy Tasbolatuly.