Búgin Ońtústik Qazaqstan oblysynda dástúrli halyqaralyq mamandandyrylǵan AgriTek Shymkent’2017 aýyl sharýashylyǵy kórmesi jumysyn bastady.
Shymkent qalasyndaǵy «Kórme» ortalyǵynda úsh kún boıy ótetin altynshy halyqaralyq mamandandyrylǵan kórmeniń ashylý saltanatyna qatysqan oblys ákimi J.Túımebaev Ońtústik Qazaqstan oblysy aýyl sharýashylyǵy salasynda ekonomıkanyń jańa draıverine aınalyp keletinin jetkizdi.
«Bul memlekettiń qoldaýy men sharýalardyń tynymsyz eńbeginiń jemisi. Oblystyń egin sharýashylyǵynda zamanaýı tehnologııalardy qoldaný jumysy qarqyndy túrde damyp keledi. Mysaly, búgingi tańǵa oblysymyzdy 2,8 myń ga qarqyndy baý bar, olardyń ónimdiligi 29,0 myń ga basqa baýǵa qaraǵanda 1,5-2 esege artyq. Sonymen qatar, oblysta 5 myń sharýashylyqqa tıesili 1,3 myń gektardan astam jylyjaılar bar, onyń ishinde 17 birlik avtomattandyrylǵan óndiristik jylyjaılar. Sonymen qatar sút baǵytynda jańa tehnologııalardy qoldaný belsendi túrde júrgizilýde. Zamanaýı qondyrǵylardyń arqasynda sıyrdyń árbir basynan jylyna 7 myń lıtrge deıin sút alynady. Al sıfrlyq tehnologııany qoldanýdyń nátıjesinde qus etin óndirý 5 esege deıin artady»,-dedi aımaq basshysy.
Búgingi kórmede Qazaqstannan bólek, Ońtústik Koreıa, Reseı, Túrkııa, О́zbekstan syndy sheteldik 50-den astam kompanııa ókilderi óz ónimderin usynyp otyr. Onda kelýshiler aýylsharýashylyq tehnıkasy men jabdyqtaryn, qosalqy bólshekterdi, sýarý jáne tyńaıtý tehnologııalaryn, jylyjaılardy, tuqymdar men ekpelerdi, tyńaıtqyshtardy, ósimdikterdi qorǵaý quraldaryn, mal sharýashylyǵyna arnalǵan tehnologııalardy, veterınarlyq tehnologııalardy kóre alady.
Halyqaralyq kórmede otandyq jáne sheteldik kompanııalar men kásiporyndar oblystyń agrarlyq saladaǵy jetistikterin kórsetip qana qoımaı, olarmen iskerlik baılanysty nyǵaıtyp, ozyq tehnologııalar týraly paıdaly maǵlumattar ala alady. Dástúrge aınalǵan AgriTek Shymkent – 2017 kórmesi Qazaqstan men shet memleketterdiń agrarlyq saladaǵy jetistikterin odan ári molaıta túsetin bolady.
Aıta keteıik, jalpy aýyl sharýashylyǵy ónimderiniń sapasy men ónim kólemin arttyrý úshin bıyl Ońtústiktiń sharýalary 900-den astam aýyl sharýashylyǵy tehnıkalaryn satyp alǵan.