Sýretshi de, rejısser de, jýrnalıst te bir ózi

El táýelsizdigine 20 jyl tolýyna oraı ótkizilip jatqan sharalar tizbegi taǵy bir azamattyń kórmesimen tolyqty. Prezıdenttik mádenıet ortalyǵynyń «Qasıet» zalynda sýretshi, rejısser, telejýrnalıst Januzaq Músápirdiń jeke kórmesi ashyldy. Ol elimizdegi birneshe telearnalarda súbeli habarlar jasap, qazaq teledıdarynyń órkendeýine úlken úles qosyp júrgen azamat. Atap aıtsaq, «Rahat» telearna­synda «Oıtolqyn», «El múddesi» jáne «Injý-marjan», al «Habar» arnasynda tikeleı efırden beriletin «Kózqaras» baǵdarlamalary arqyly qazaq halqynyń zııaly qaýymy, aqyn-jazýshylar, óner, mádenıet qaıratkerleriniń shy­ǵar­mashy­lyǵy men ǵumyrnamasy týraly tereńnen tartqan habarlar jasap, el rýhanııatyna úlken úles qossa, rejısser retinde arǵy tarıhtaǵy Qurmanǵazy, Dına, Mahambet, Abaı, Shákárim, Jambyl týraly túsirgen shoqty­ǵy bıik dúnıeleri óz kórermenin taba bildi. Sondaı-aq, Januzaq Kerimbek­ulynyń Mahambettiń týylǵanyna 200 jyl tolý qurmetine arnaıy túsirilgen 8 derekti fılminen óz isiniń kánigi sheberiniń qoltań­basyn kórýge bolady. Qazaqtyń belgili kúıshisi Qarshyǵa Ahmedııarovpen birge shyǵarmashylyq izdenisten týǵan osy fılmder «Mahambet» atyndaǵy syılyq­pen marapattaldy. Búginde Januzaq Músápir «Qazaq­stan» RTRK» AQ aqparat­tyq-saraptamalyq baǵdarlamalar dıreksııasynyń dırektory retinde táýelsiz Qazaqstanymyzdyń saıası-ekonomıkalyq, qoǵamdyq, áleýmettik, mádenı ómirinde bo­lyp jatqan oqıǵalardy kópshi­likke jetkizý jolynda abyroı­men eńbek etýde. Onyń sýretshilik qyry da uzaq jyldar boıy ónersúıer qaýym men kásibı ortada joǵarǵy baǵaǵa ıe bolyp keledi. Januzaq Kerimbekulynyń beıneleý ónerindegi týyndylary 100-den asady desek, kórmege «Ákem», «Dastarhan natıýr­morty», «Han Táńiri», «Balyq­shy», «Kókpar», «Qobyz saryny» t.b. jumystary qoıylǵan. «Habar», «Rahat» telearnalarynda qyzmet etken ol kópke jýrnalıst retinde tanymal bolsa da, kór­mede sýretshiligi bir tóbe ekendigi baıqaldy. Osylaısha kópshilik kórme arqyly jýrnalısti jańa qyrynan tanydy. – El táýelsizdiginiń 20 jyl­dyǵy toılanaıyn dep jatqan kezde árbir qazaq, qazaqstandyq qa­rap qalmaý kerek. Bul sýretterim sońǵy jyldarda jazylǵan ju­mys­tar. Buryn jazylǵan jumys­tar óte az, 1-2 kartına ǵana bar. Sondyqtan da bári búgingi kúnniń kórinisi dep aıtýǵa bolady, deıdi ol óz kórmesi haqynda. Venera TÚGELBAI.