Aqtóbe oblysynyń ákimi Berdibek Saparbaev jáne QR Investısııalar jáne damý mınıstrligi Avtomobıl joldary komıtetiniń tóraǵasy Mereke Pishembaev qurylys jumystarynyń bastalýyna ruqsat berdi.
Sharaǵa «Qaz Avtojol UK»AQ ókilderi, sonymen qatar «Dongsýng» (Koreıa) kompanııasynyń, «Todını Konstrýsıonı Djeneralı S.p.A.» (Italııa) AQ, «SPIK Akkord» (Ázirbaıjan), «Tashıapı Inshaat» (Túrkııa), «Ant Inshaat» (Túrkııa) syndy merdigerlik uıymdardyń basshylary qatysty.
«Memleket basshysynyń tapsyrmasyna sáıkes,«Nurly jol» baǵdarlamasy aıasynda aımaqta uzyndyǵy 500 shaqyrym bolatyn «Aqtóbe-Atyraý» avtojolyn qalpyna keltirý boıynsha iri joba júzege asyrylýda. Joldyń bul bóligi sońǵy ret 50 jyl buryn jóndelgen.Avtojoldyń qazirgi jaǵdaıy osy zamanǵy júktemelerge jáne kólik quraldarynyń qarqyndylyǵyna sáıkes kelmeıdi. Bul jol Reseı Federasııasynyń Astrahan, Ortalyq Azııa jáne Parsy shyǵanaǵy elderine shyǵatyn Aqtóbeden Atyraý men Mańǵystaýǵa deıingi baǵyttardyń joldaryn qosyp, Qazaqstan, Qytaı, Reseı jáne Batys Eýropa arasyndaǵy men taýarlar tranzıti men jolaýshylar legine, sondaı-aq óńirdegi saýda men jergilikti kásipkerlikti damytýǵa múmkindik beredi. Joldy qalpyna keltirý barysynda shamamen 2 myń adam jańa jumys oryndarymen qamtamasyz etiledi, olardyń 90 paıyzy jergilikti turǵyndar», - dedi oblys ákimi.
Búginde joldyń atalǵan bóligindegi qozǵalys qarqyndylyǵy táýligine 2 187 avtokólik bolsa, keleshekte barlyq jóndeý jumystary aıaqtalǵannan keıin táýliktik qarqyndylyǵy 4 791 avtomobılge jetpek.
Qazaqstan Investısııalar jáne damý mınıstrligi Avtomobıl joldary komıtetiniń málimeti boıynsha «Aqtóbe - Atyraý» jol bóligin qaıta qalpyna keltirýge Azııa damý banki men Islam damý banki sııaqty halyqaralyq qarjy ınstıtýttarynyń qaryz qarajattary tartylatyn bolady.
Qalpyna keltirilýi tıis 455 shaqyrym Aqtóbe-Atyraý avtojolynyń 156 shaqyrymdyq Aqtóbe-Qandyaǵash bóligi boıynsha konkýrstyq rásimder júrgizilip, 215,0 mln AQSh dollary kóleminde Islam damý bankimen qaryz týraly kelisimge qol qoıylýda, «Qandyaǵash-Maqat» jol bóligi boıynsha 240,3 mln AQSh dollary kóleminde Azııa damý bankimen qaryz kelisimine qol qoıylyp, ratıfıkasııalandy, sondaı aq, uzyndyǵy 299 shaqyrym bolatyn jeti jol bóliginiń qurylys jumystarymen aınalysatyn merdigerlik uıymdar anyqtalyp, olarmen kelisim-shart jasaldy.
Jobany júzege asyrýǵa Italııa, Ázirbaıjan, Túrkııadan osy salada úlken tájirıbesi bar sheteldik kompanııalar tartylǵan, jobanyń oryndalý barysyn «QazAvtoJol UK» AQ jobasyn basqarý jónindegi keńesshiler men «Dongsýng / Jol Sapa» (Koreıa / Qazaqstan) ókilderi baqylamaq. Jobany 2020 jyly aıaqtaý josparlanǵan.