Azamattarǵa ońtaıly jańa qaǵıdalar

Taratyp aıtar bolsaq, qabyl­daýǵa baılanysty ótinimdi Call-ortalyǵyna (115) qońyraý shalý nemese «115.kz» jáne «egov.kz» portaldary arqyly, sondaı-aq jazbasha berýge bolady. Qabyldaýǵa tirkeý prokýratýra organdarynyń quziretine kiretin suraqtar bo­ıynsha júr­giziledi. Bas prokýratýra basshylyǵy qabyldaýdy ke­minde aıyna bir ret, oblystyq prokýratýra basshylyǵy aptasyna bir ret júrgizedi. Sonymen qatar endi oblys jáne aýdan prokýrorlary óz qabyldaýyna kelgenderge bergen aldyńǵy jaýaptarynyń bolǵanyna qa­ramastan, qabyldaýǵa mindetti. Al basqa qyzmetkerler, sonyń ishinde aýdan prokýrorlary da qabyldaýdy qajettilik týyndaǵanyna baılanys­ty kúndelikti júrgizedi. Ol úshin jazylý kerek emes.

Qabyldaýǵa ókilettik be­ril­gen prokýratýra organ­dary­nyń qyzmetkerleri bekitilgen kestelerge sáıkes jumys ýa­qy­tynda saǵat 9.00-den bas­tap 18.30-ǵa deıin kúndelikti qabyl­daıdy. Ishki ister organdarynda, penıtensıarlyq jáne arnaýly mekemelerde azamattardy qabyldaýdy bekitilgen keste boıynsha kezekshi prokýrorlar júrgizedi. Kestemen mekemelerdiń ǵımarattarynda tanysýǵa bolady.

Bir eskeretin jaıt, qajet­tilik­ke qaraı oblys prokýror­lary ótinish berýshilerdi qabyl­daýdy ózderiniń orynbasarlaryna tapsyrýy múmkin. Al­ǵashqy kezdegideı, aryz ıeleri ótinishtiń qaraýyna jeke qaty­sýǵa jáne qujattar usynýǵa qu­qyly. Oblystyq jáne aýdan­­dyq prokýratýralardyń qyz­metkerleri jeke qabyl­daýdan túsken ótinishterge jaýapty qanaǵattandyrýdan bas tartýǵa sebep bolǵan negizderdi túsindirip, ótinish berýshiniń jeke ózine tapsyrady. 

Jańa qaǵıdalarda Bas prokýratýra basshylyǵynyń qa­byldaýyna jazý júr­gizilmeıtin negizder de kór­setilgen. Máselen, ótinishte kór­­setilgen másele bo­ıynsha buryn qabyldanǵan nemese tıisinshe, Bas prokýrordyń jáne onyń oryn­basarynyń jaýaby bar bol­ǵanda, eger Qylmystyq-prosestik kodekstiń 106-­babynyń 1-bóligine sáıkes, aryzdardyń qaralýy sottyń qu­ziretine kiretin bolsa, son­daı-aq sotqa joldanǵan qyl­mystyq ister boıynsha, sot aktilerine shaǵym berý mer­zimin ótkizip alǵan kezde, Azamattyq prosestik kodekstiń 54-babynyń 2-bóligimen kóz­delmegen ister boıynsha sot akti­lerin daýlaǵanda (mindetti emes sanattaǵy ister boıynsha), kassasııalyq tártipte qaı­ta qaraýǵa jatpaıtyn sot aktilerine shaǵymdanǵanda (APK-tiń 429-babynyń 7-bóligi, 434-babynyń 2-bóligi jáne QPK-niń 484-babynyń 2-bóligi) Bas prokýratýra basshylyǵynyń qabyldaýyna jazý júrgizilmeıdi.

Sonymen qatar Bas prokýratýra basshylyǵynyń qa­byl­da­ýyna azamattardyń Qu­qyq qorǵaý qyzmetteri orta­lyǵy arqyly jazylýyna múm­kindikteri baryn da aıta keteıik. Bul ortalyq bıylǵy jyldyń shildesinde Bas prokýratýranyń ǵımaratynda ashylǵan. Ony ashý «100 naqty qadam» Ult josparynan týyndaıtyn min­detterdi iske asyrý aıasynda júzege asyrylǵan bolatyn. Sha­ǵymdardy jedel qaraý, aza­mattardyń quqyq qorǵaý jáne memlekettik organdaryna senimin arttyrý, ákimshilik kedergilerdi jáne bıýrokratııany joıý negizgi maqsaty bolyp tabylatyn atalǵan ortalyq HQKO- sııaqty jumys jasaıdy. Biraq tek quqyq qorǵaý máselelerimen aınalysady. Ortalyqta tájirıbeli prokýrorlarmen birge basqa organ­dardyń ókilderi, advokattar, probasııa qyzmeti jáne psıholog azamattardy qabyldaıdy, zańdardyń qoldaný suraqtary boıynsha keńes beredi jáne ótinishterdi daıyndaýǵa kómek kórsetedi. 

Qazirgi tańda mundaı orta­lyq­tar Aqtóbe men Qyzyl­or­da qala­larynda qyzmetin bas­tap ketti. Jyl­dyń aıaǵyna deıin barlyq óńirlerde osyndaı ortalyqtar ashý kózdelýde.

Joldybaı BAZAR, «Egemen Qazaqstan»