Astanada Qazaqstan halqy Assambleıasy Keńesiniń keńeıtilgen otyrysy ótti. Is-sharaǵa Memlekettik hatshy Gúlshara Ábdiqalyqova, QHA Tóraǵasynyń orynbasary – Hatshylyq meńgerýshisi Darhan Myńbaı, Májilis depýtattary, ortalyq jáne jergilikti atqarýshy organdardyń basshylary, Keńes músheleri, qoǵam qaıratkerleri, ǵylym jáne shyǵarmashyl zııaly qaýym qatysty.
Jıynda sóz sóılegen Memlekettik hatshy G.Ábdiqalyqova Elbasy Nursultan Nazarbaevtyń tapsyrmasy boıynsha Qazaqstanda ekonomıkany, saıasat pen qoǵamdyq sanany qamtıtyn júıeli ári aýqymdy jańǵyrtý bastalyp ketkenin atap ótti.
Osy oraıda, Memlekettik hatshy elimiz ben Qazaqstan halqy Assambleıasynyń jańa damý qadamyna bet alǵanyna toqtaldy. Onyń aıtýynsha, qoǵamdyq sanany damytýǵa baǵyttalǵan «Rýhanı jańǵyrý» baǵdarlamasy Assambleıa jumysyna tyń serpin berdi. Máselen, elimizde 1 338 etnomádenı birlestiktiń jumys isteıdi, 41 dostyq úıi ashyldy, 3 myńdaı qoǵamdyq kelisim keńesteri qyzmet atqarady.
G.Ábdiqalyqova QHA aıasynda jasalatyn qaıyrymdylyq is-sharalarynyń da oń nátıje kórsetkenin atap ótti. Máselen, eki jyl buryn mundaı uıymdardyń quramynda 900-ge jýyq adam bolǵan. Búginde olardyń sany 30 myńnan asyp jyǵylady. Memlekettik hatshy keltirgen derekterge súıensek, 500 myńnan astam adam, 18 myńnan astam uıym 4,1 mıllıard teńgeden astam qarajat kóleminde qaıyrymdylyq kómek aldy.
Memlekettik hatshy «Týǵan jer», «Qazaqstannyń kıeli jerleriniń geografııasy», «Jahandaǵy zamanaýı qazaqstandyq mádenıet», memlekettik tildi latyn grafıkasyna kóshirý jónindegi jobalardy iske asyrýǵa barlyq etnomádenı birlestiktiń atsalysýy kerek ekenine nazar aýdardy.
«Rýhanı jańǵyrý barysyna Qazaqstannyń árbir azamaty atsalysýy kerek. Qazaqstan halqy Assambleıasy eldegi ár aımaqta qoǵamdyq sanany jańǵyrtý jobalaryn oryndaýǵa óz úlesin qosyp keledi. Ásirese, Assambleıanyń aımaqtardaǵy ofıstik jobalarǵa qatysqany mańyzdy. Qazirgi tańda QHA myńdaǵan aımaqtyq jobamen aınalysady. Buǵan qosa, Assambleıanyń 76 jeke jobasy bar», dedi G.Ábdiqalyqova.
Memlekettik hatshy keler jyly elordanyń 20 jyldyǵy atap ótiletinin jetkizdi. Onyń aıtýynsha, Astana – táýelsiz Qazaqstannyń sımvoly ispetti. Ári jańa shahar – Prezıdent ıdeıasyn iske asyrýdyń kórinisi jáne búkil halyqtyń eńbeginiń nátıjesi. Osy aıtýly mereıtoıǵa oraı, G. Ábdiqalyqova QHA-ǵa tıisti is-sharalar josparyn ázirleýdi usyndy.
Sonymen qatar, G.Ábdiqalyqova QHA-nyń «EKSPO-2017» halyqaralyq mamandandyrylǵan kórmesine qatysýyn da joǵary baǵalady. Onyń sózine súıensek, Elbasy N.Nazarbaevtyń qoǵamdyq kelisim men jalpyulttyq birliktiń biregeı modelin tanystyrýy shara aıasyndaǵy eń mańyzdy oqıǵalardyń biri boldy.
QHA Tóraǵasynyń orynbasary – Hatshylyq meńgerýshisi D.Myńbaı óz sózinde 2017 jyldyń Qazaqstan úshin óte sátti ótkenin málimdedi. Bıylǵy eleýli oqıǵanyń qatarynda sanalatyn Elbasynyń «Bolashaqqa baǵdar: rýhanı jańǵyrý» maqalasy halyqtyń sanasyna serpin berip, oıyna oı qosyp jatyr.
«Halyqty tól tarıhy arqyly tárbıeleý, salt-dástúr aıasynda toptastyrý, jalpyulttyq múddege jumyldyrý, jeke adamnyń ónegesi arqyly patrıotızmdi qalyptastyrý sekildi biriktirýshi ıdeıalardy iske asyrý, jańǵyrýdyń ózegi biregeılikti nyǵaıtý maqsatynda Qazaqstan halqy Assambleıasyna da birqatar mindetter qoıyldy», dedi D.Myńbaı.
Sondaı-aq, keńeıtilgen otyrysta «QHA Dostyq elshisi» qurmetti ataǵyn bekitý máselesi qarastyryldy. D.Myńbaıdyń aıtýynsha, bul – óte ózekti taqyryp. О́ıtkeni, kóptegen memleketter Assambleıanyń jumysyn joǵary baǵalap, elimizdiń tájirıbesin óz eline engizýge qushtarlyq tanytyp otyr.
Jańa ataq Qazaqstan halqynyń múddelerine ókildik etetin, sondaı-aq Qazaqstannyń jáne ózi turatyn memleket arasyndaǵy ekijaqty qarym-qatynastardy damytý múddesine qyzmet etetin tulǵa. «Qazaqstan halqy Assambleıasynyń Dostyq elshisi» óz jumysyn QHA basshylyǵymen kelise otyryp atqarady. Sonymen qatar, jyl saıyn atqarǵan qyzmeti jóninde Assambleıaǵa esep berýge mindetti.
Jıyn barysynda «Qazaqstan halqy Assambleıasy týraly» zańǵa engiziletin ózgerister men tolyqtyrýlar jobasy, «Qazaqstan halqy» ınteraktıvtik tarıh kartasynyń, kóp fýnksıonaldy mýltımedııalyq portaldyń ázirlený barysy, «Rýhanı jańǵyrý» baǵdarlamasyn iske asyrýdaǵy Pavlodar oblystyq Assambleıasynyń tájirıbesi talqylandy.
Keńes uıymdastyrý máselelerin qarastyryp, Qazaqstan Prezıdenti – Qazaqstan halqy Assambleıasynyń Tóraǵasyna «Birlik» altyn medalimen, «Jomart jan» tósbelgisimen, QHA Tóraǵasynyń qurmet gramotasymen jáne alǵys hatymen marapattaý úshin kandıdatýralar boıynsha usynystar engizdi.
Abaı ASANKELDIULY,
«Egemen Qazaqstan»
Sýretti túsirgen, Erlan OMAROV