Ońtústik Qazaqstan oblysynda jalpy aýmaǵy 1573,5 myń gektardy quraıtyn Shymkent aglomerasııasyn damytýǵa basymdyq beriletin bolady. Bul týraly OQO ákiminiń baspasóz qyzmeti habarlady.
Ondaǵy negizgi maqsat – qala aýmaǵyndaǵy eldi mekenderdiń áleýmettik, ekonomıkalyq, ınfraqurylymdyq máseleleri sheshý. Búgin bul týraly OQO óńirlik kommýnıkasııalar qyzmetinde ótken brıfıngte oblystyq sáýlet jáne qala qurylysy basqarma basshysynyń orynbasary Baqtybaı Dúısebekov málim etti.
Onyń aıtýynsha, aglomerasııa – ekonomıkalyq, mádenı jáne turmystyq jaǵynan bir-birimen tyǵyz baılanysty eldi mekenderdiń shaǵyn aýmaqqa shoǵyrlanýy.
«Shymkent aglomerasııasyna 9 qala, aýdan aýmaqtary kiredi. Boljamǵa sáıkes, 2020 jylǵa qaraı aglomerasııasynyń halqy 10,3 paıyzǵa artady dep kútilýde. Al, 2030 jyly aglomerasııa halqynyń sany bazalyq kezeńge qaraǵanda 29,7 paıyzǵa kóbeıedi» , - dedi Baqtybaı Elikuly.
Sonymen qatar, Shymkent aglomerasııasy aýmaǵynda 2020 jyldyń sońyna qaraı mektepke deıingi uıymdardy 35 paıyzǵa, al bilim beretin mektepterdiń sanyn 17 paıyzǵa ulǵaıtý josparlanǵan. Budan bólek, stasıonarlyq kómek kórsetetin uıymdardyń sany 2020 jylǵa qaraı 11 paıyzǵa kóbeıetin bolady. Sondaı-aq «Nurly jer» baǵdarlamasyna sáıkes, jaldamaly turǵyn úı qurylysynyń kólemi de artpaq.
Ázirlengen jobaǵa sáıkes, halyqtyń kóshi-qon aǵynyń ustap qalý úshin «kontrmagnıtter» dep atalatyn iri eldi mekender damytylady. Ol úshin ońtústik baǵytta Saryaǵash, al batys baǵytynda Arys qalasy, sondaı-aq shyǵys baǵytynda Turar Rysqulov aýyly tańdalyp alynǵan. Halyqtyń ishki kóshi-qon ortalyqtaryn damytý maqsatynda seriktes eldi mekender retinde Leńgir qalasy, Aqsý, Qazyǵurt, Badam, Temirlan, Tórtkúl, Shaıan eldi mekenderi belgilenip otyr.
Aıta keteıik, jobada aglomerasııa aýmaǵynda ómir súrýdiń qolaıly jaǵdaılaryn qamtamasyz etýge baǵyttalǵan ınjenerlik, kóliktik, áleýmettik, rekreasııalyq ınfraqurylymdarynyń keshendi damytý sharalary qarastyrylǵan.