Parıjde (Fransııa) IýNESKO Bas konferensııasynyń 39-sessııasy aıasynda áleýmettik jáne gýmanıtarlyq ǵylymdar boıynsha komıssııanyń otyrysy ótti, onda Qazaqstan Respýblıkasyndaǵy Halyqaralyq mádenıetterdi jaqyndastyrý ortalyǵyna 2 sanattaǵy IýNESKO ortalyǵynyń mártebesin berý sheshimi bir aýyzdan maquldandy.
Kezdesýge Qazaqstan Respýblıkasynyń Mádenıet jáne sport vıse-mınıstri A.Raıymqulova, IýNESKO janyndaǵy Qazaqstan Respýblıkasynyń turaqty ókilderi, halyqaralyq sarapshylar, sondaı-aq IýNESKO-nyń basqa memleketterden kelgen mamandary da qatysty.
Qazirgi álemdegi jaǵdaı bizdi mádenıetter men halyqtar arasyndaǵy únqatysý jolynda jedel qımyldaýǵa májbúr etedi. Mádenıetterdi jaqyndastyrýdyń tujyrymdamalyq negizin qurý mańyzdy halyqaralyq bastamalardy iske asyrýsyz múmkin emes. Osyǵan baılanysty Qazaqstan Respýblıkasy Mádenıet jáne sport mınıstrligi ýaqtyly sheshim qabyldady jáne Mádenıetterdi jaqyndastyrýdyń halyqaralyq ortalyǵyn qurý boıynsha aýqymdy jumys júrgizdi.
Ortalyqtyń negizgi basymdyqtary Ortalyq Azııa aımaǵynda jáne Jibek jolynda ǵylymı zertteýler júrgizýge, praktıkalyq áleýetin qalyptastyrýǵa, halyqaralyq qoǵamdastyqpen aqparat almasýǵa, áriptestik pen ózara árekettestikti ornatýǵa baǵyttalǵan. «Qazaqstan úshin bul úlken jetistik. Bul mártebeni alý úshin birqatar rásimderdi ótý kerek.
Birinshiden, bir nemese birneshe múshe memleket mekemeniń kandıdatýrasyn usynady. Bul IýNESKO-nyń Ulttyq komıssııalarynyń jaýapkershiligindegi qyzmet. Sodan keıin ótinish berýshi mekeme IýNESKO Atqarý keńesine usynys daıyndaıdy, Uıymnyń Bas Konferensııasynyń kandıdatýrasyn usynady. Bas konferensııa bastamany qarastyrady jáne mártebeni berý týraly sheshim qabyldaıdy», - dedi Mádenıet jáne sport vıse-mınıstri Aqtoty Raıymqulova.