Azııa chempıonaty: 1 altyn, 1 kúmis, 4 qola

Ár eki jyl saıyn turaqty túrde uıymdastyrylyp turatyn bokstan qyzdar arasyndaǵy saryqurlyq birinshiliginde qurama qorjynyna jalǵyz altyndy 64 kıloda synǵa túsken Madına Nurshaeva saldy. Ol fınalda qytaılyq boksshy Doý Dandy jeńip, Azııa chempıony degen ataqqa qol jetkizdi. Aıta keteıik, bul Madına Nurshaevanyń karerasyndaǵy alǵashqy altyn medali. Al 69 kılo salmaq dáre­jesinde judyryqtasqan Valentına Halzova fınaldyq aıqasta qytaılyq Gý Hongqa ese jiberip, bıylǵy Azııa birinshiliginiń kúmis júldegeri atandy.

Bokstan qyzdar quramasy­nyń bas jattyqtyrýshysy Vadım Prısıajnıýk  chempıonat aldynda eki altyn alamyz dep aıtqan bolatyn. Osy chempıonatta eki dúrkin álem chempıony Nazym Qyzaıbaı óz aldyna Azııa chempıony atanýdy maqsat etip qoıǵan edi. О́ıt­keni búginde Nazymnyń júlde qory­na Olımpıada men Azııa birinshi­ligi­niń altyny jetispeı tur. Alaıda Qyzaıbaıdyń altynǵa degen úmitin Soltústik Koreıa ókili Peng Chol Mı sóndirdi. Jartylaı fınalda Nazym Qyzaıbaı Chol Mıge 2:3 esebimen ese jiberip, qola júldeni qanaǵat tutty. 

Sondaı-aq Rıo Olımpıada­synyń qola júldegeri atanǵan Darıǵa Shákimovanyń da eki dúrkin Azııa chempıony bolý armany oryndalmady. Shákimovanyń jolyn jartylaı fınalda taǵy bir qytaılyq boksshy Lı Kıan kesti. Eki jyl buryn­ǵy chempıonattyń fınalynda Darıǵa dál osy boksshyny jeńip, chempıon atanǵan edi. Sonymen qatar qurama qorjy­nyn Móldir Bazarqulova (81 kg) men Lázzat Kúngeıbaeva (+81 kg) Azııa chempıonatynyń qola júldesimen tolyqtyrdy. Kún­geı­baeva qatarynan ekinshi ret Azııa chempıonatynyń qola júl­desin ıelengenin aıta keteıik. Qyzdar quramasynyń bas jat­tyq­­tyrýshysy Vadım Prısıaj­nıýk Vetnam sapary aldyn­da jýrnalısterge bergen suh­batynda elge eki altyn medalmen oralaty­nyn aıtqan edi. Osydan eki jyl buryn Qytaıda ótken Azııa chem­pıo­­natynda qyzdarymyz  bir al­tyn, úsh qola medal jeńip alǵan-dy.

Álı BITО́RE, «Egemen Qazaqstan»