Almatyda Qazaqstan Respýblıkasynyń Tuńǵysh Prezıdenti – Elbasy kitaphanasy Qazaqstan Respýblıkasy Memlekettik ortalyq mýzeıinde «N. Nazarbaev: dáýir, tulǵa, qoǵam» atty kóshpeli ǵylymı-bilim berý jáne mádenı-aǵartýshylyq kórme jobasy óz jumysyn bastady.
El astanasyn Almatydan arqa tórine kóshirgen 20 jyldyń ishinde alǵash ret Memleket basshysynyń Jeke arhıvi, Jeke kitaphanasy jáne Mýzeıi qorynyń zertteý nátıjeleri men materıaldary Almaty jurtshylyǵynyń nazaryna usynylyp otyr. Birer aıǵa sozylatyn aıtýly jobanyń saltanatty ashylý rásimine Qazaqstan Respýblıkasy Prezıdenti Keńsesiniń basshysy – Qazaqstan Respýblıkasynyń Tuńǵysh Prezıdenti – Elbasy kitaphanasy dırektorynyń mindetin atqarýshy Mahmut Qasymbek, Qazaqstan Respýblıkasynyń Mádenıet jáne sport mınıstri Arystanbek Muhamedıuly, Almaty qalasynyń ákimi Baýyrjan Baıbek bastaǵan birqatar qurylymdardyń basshylary men zııaly qaýym ókilderi qatysty. Joba aıasynda kórermen nazaryna Elbasy kitaphanasynyń arhıv, kitap, mýzeı qorlarynyń materıaldary usynylmaq. Olardyń qatarynda shet memleket jáne úkimet basshylarynyń Elbasyna tartý etken joǵary memlekettik nagradalary, Qasıetti Qurannyń biregeı jınaqtary men tanymal tulǵalardyń syılaǵan qoltańbalyq kitaptary, sondaı-aq N. Á. Nazarbaevtyń álem tilderine aýdarylǵan eńbekteri bar.
– Bul mańyzy zor jobany Almatyda bastaýymyzdyń ózindik sebepteri bar. Almaty álemge áıgili mádenıet pen ónerdiń ortalyǵy. Táýelsizdigimiz de eń alǵash osy Almatyda jarııalanǵan bolatyn. Sondyqtan, Almaty barsha Qazaqstandyqtar úshin erekshe ystyq bárimizdiń júregimizge jaqyn qala bolyp sanalady. Bul joba Almatynyń mádenı jáne rýhanı ómirindegi asa bir eleýli oqıǵa bolady dep úmittenemiz. Kórmeniń aıasynda biz kóptegen semınarlar, konferensııalar, kezdesýler ótkizetin bolamyz. Barlyq Almatylyqtar men qala qonaqtaryn tarıhı mańyzy zor, máni tereń kórmeni tamashalap kózaıym bolýǵa shaqyramyz. Kórmeniń negizgi maqsaty – Elbasynyń Táýelsiz Qazaqstan taǵdyryndaǵy rólin muraǵat qujattary men jádigerler arqyly júıeli túrde keńinen kórsetý, – dedi kórmeniń ashylý saltanatynda sóılegen sózinde Mahmut Qasymbek.
Kórmeniń barlyq jumys kúnderi qala turǵyndary men qonaqtary taqyryptyq jáne sholý ekskýrsııalaryn tyńdap, Elbasy kitaphanasy qyzmetiniń baǵyttarymen jan-jaqty tanysa alady. Uıymdastyrýshylardyń málimdeýinshe kórme jumysy negizgi tórt bólimnen turady. «Kóshbasshy joly» bólimi Elbasy Nursultan Nazarbaevtyń ómir kezeńderinen syr shertip, Ulttyq Kóshbasshynyń joly rýhanı sananyń dáýiri men shyǵýy mazmunyn bildiretin tarıhı úderister men oqıǵalardy sıpattaý arqyly kórsetiledi.
«Kóshbasshy fenomeni» bóliminde jahandyq keńistikte turaqtylyq pen qaýipsizdiktiń jańa ıdeıalaryn engizgen N.Á.Nazarbaevtyń memlekettik qurylym tujyrymdamasynyń qalyptasýy men damýy tarıhyna jeteleıdi. Kóshbasshy fenomeni Semeı ıadrolyq polıgonynyń jabylýynan bastap memleket astanasyn aýystyrý ıdeıasyn júzege asyrýǵa deıingi tarıhı mańyzy bar sheshimder men bastamalar arqyly kórinis tapqan.
«Elbasy mártebesi – el mártebesi» bóliminde Kóshbasshynyń jáne Qazaqstan halqynyń jahandyq úderisterdiń turaqtylyǵy men órkendeýine qosqan úlesin taný belgisi retinde usynylǵan Elbasynyń joǵary memlekettik nagradalary baıandalǵan.
Al, «Álem qadirlegen Elbasy» bóliminde elimizdiń qarqyndy syrtqy saıasaty kórsetiledi. Bul – álemdik deńgeıdegi saıasatkerdiń bıik bedelin tanytady. Elimizdiń kópvektorly syrtqy saıasaty dıplomatııalyq syılyqtar, jeke jazbalar, muraǵattyq materıaldar arqyly kórinis tapqan.
– Táýelsizdigimizdiń altyn besigi Almatyda bastaý alǵan bul sharanyń mańyzy zor. Memleket basshysy halqymyzdyń ǵasyrlar boıy ańsaǵan erkindiginiń esigin ashty. Tarıh úshin óte qysqa merzimde el ekonomıkasyn qaryshtap damytyp ishki jáne syrtqy saıasattyń qýatyn álemdik deńgeıge kóterdi. Qazirgi ýaqytta elimiz álem mádenıetiniń quramdas bóligine aınaldy. Elbasymyzdyń bastamasymen ulttyq salt-dástúrlerimizdi, tilimiz ben ónerimizdi, ádebıetimizdi, bir sózben aıtqanda ulttyq rýhymyzdy jańǵyrtýdy bastadyq. Elbasymyzdyń «Rýhanı jańǵyrý» baǵdarlamasy tek elimizdiń ǵana emes, sheteldik sarapshylar men halyqaralyq uıymdar tarapynan da joǵary baǵaǵa ıe bolǵanyn kórip otyrmyz. Sondyqtan búgingi jobanyń keler urpaqtyń kemel keleshegi úshin, elimiz úshin bereri kóp – deıdi Qazaqstan Respýblıkasy Mádenıet jáne sport mınıstri Arystanbek Muhammedıuly.
Ekskýrsııalar balabaqsha tárbıelenýshileri, oqýshylar men stýdentter ispetti túrli jas sanatyndaǵy aýdıtorııa múshelerine arnalǵan. Osylaısha, Almaty jurtshylyǵy aldaǵy kúnderi tarıhı mańyzy zor kórmedegi qundy jádigerlerdi óz kózimen kórip tamashalaı alady.
Eske salsaq, 2016 jyly Qazaqstannyń qazirgi tarıhyndaǵy erekshe ortalyq – Qazaqstan Respýblıkasynyń Tuńǵysh Prezıdenti Mýzeıi Kitaphanaǵa qosylǵan bolatyn. Elbasy kitaphanasy ulttyq mádenı-tarıhı muramyzdy quraıtyn zamanaýı elektrondyq-muraǵattyq ınfroqurylymǵa jáne erekshe aqparattyq resýrstarǵa ıe.
Arman OKTIаBR,
«Egemen Qazaqstan»
ALMATY