Aısholpannyń dáriger bolsam degen armany jýyq arada oryndalady. Mońǵolııa premer-mınıstri Ý.Húrelsúh beısenbi kúni búrkit baptap tanymal bolǵan qazaq qyzy Aısholpan Nurǵaıypqyzyn qabyldady, dep habarlaıdy asiarussia.ru.
Rejısser Otto Bellanyń «Búrkitshi qyz» derekti fılminiń bas keıipkeri, mońǵolııalyq qazaq qyzy Aısholpan qazirgi tańda 11-synypta oqıdy. Taıaýda ǵana ol Azııanyń «Asia Game Changer Awards 2017» marapatyn jeńip alǵan bolatyn.
«Búrkitshi qyz» fılmi - tamasha týyndy. Siz áıelderge tán erekshe erlik pen batyldyqty, tózimdilikti tanytyp, Mońǵolııany álemge tanyttyńyz», - dedi premer-mınıstr jas qyzdy búkil Mınıstrler kabınetiniń atynan quttyqtap.
Premer-mınıstr, sondaı-aq Aısholpannyń ata-anasyna osyndaı ınabatty qyzdy tárbıelep otyrǵany úshin alǵysyn bildirdi.
Aısholpan Mońǵolııa premer-mınıstrine dáriger bolýdy armandaıtynyn aıtty. Tanymal fılm ekranǵa shyqqan soń, búrkitshi qyz Garvard jáne Oksford ýnıversıtetterinen shaqyrý aldy. «Kınoda oınaý qyzyqty bolsa da, men dáriger bolýdy armandaımyn», - dedi ol premer-mınıstrge.