Aqtóbe qalasynan ońtústikke qaraı 30 shaqyrym qashyqtyqta ornalasqan Bestamaq aýylynda qazaq halqynyń dańqty perzenti Eset batyr Kókiulynyń 350 jyldyq mereıtoıy keń kólemde atalyp ótildi. Bul týraly Aqtóbe oblysy ákiminiń baspasóz qyzmeti habarlady.
Saltanatty sharaǵa Aqtóbe oblysynyń ákimi Berdibek Saparbaev qatysty.
Merekeniń dál osy jerde ótkizilýiniń úlken máni bar, sebebi - bul aýylda qazaqtyń uly qolbasshysy máńgilik baıyz tapqan. Munda kıiz úılerden quralǵan úlken aýyl boı kóterip, qazaq kúresi, alaman báıge, jorǵa jarys sekildi ulttyq sport túrlerinen jarystar uıymdastyrylyp, aqyndar aıtysy ótkizildi.
Saltanatty sharanyń basty oqıǵasy - Eset batyrdyń at ústindegi músini eskertkishiniń ashylýy boldy. Shyny-plastıkten jasalǵan eskertkishtiń bıiktigi - 11,5 metr, salmaǵy - 1,5 tonna. Jergilikti kásipker Nurlan Saǵnalın eskertkishti ornalastyrý jáne aýmaqty kóriktendirý úshin «Týǵan jerge taǵzym» aksııasy aıasynda 32 mıllıon teńge bóldi.
«Qazaq halqynda «О́tkensiz búgin joq» degen maqal bar. Sondyqtan biz memleket basshysynyń «Bolashaqqa baǵdar: rýhanı jańǵyrý» maqalasynyń baǵdarlamasyna sáıkes tarıhymyzdy, rýhanı qundylyqtarymyzdy jańǵyrtýdamyz. Basty maqsat - jas urpaqty halyqqa degen súıispenshilikke, óz eliniń patrıoty bolýǵa, týǵan jerin qurmetteýge jáne qorǵaýǵa úıretý. Bul eskertkishtiń ashylýy - jastarǵa úlken úlgi, ónege», - dedi oblys ákimi.
Sondaı aq, saltanatty shara barysynda aýyldyq dárigerlik ambýlotorııanyń ashylý rásimi ótti. Medısınalyq mekeme memlekettik-jeke menshik seriktestik sheńberinde júzege asyrylǵan taǵy bir áleýmettik mańyzdy joba sanalady. Dárigerlik ambýlatorııa qajetti medısınalyq quraldarmen tolyq jabdyqtalǵan, stomatologııalyq jáne fızıoterapııa kabınetteri bar. 73 mıllıon teńgege salynǵan mekeme táýligine 80 adamdy qabyldaı alady.
Eset batyr Kókiuly – qazaqtyń qol bastaǵan belgili batyry, tarhan – joǵary áskerı-rýlyq aqsúıek ókili. Ol jarty ǵasyrdan astam ýaqyt boıy jońǵarlar men Edil qalmaqtaryna qarsy kúresken, Ábilqaıyr hannyń úzeńgiles serigi bolǵan. Eset batyr kesenesine aqtóbelik turǵyndarmen qatar Qazaqstannyń basqa óńirlerinen kelgen jurt ta táý etpeı ketpeıdi.