Atyraý oblysynda bıyl qurylys salasyna 25 mlrd teńge bólindi. Qazir tek oblys ortalyǵynda ǵana emes, aýdandarda da turǵyn úıler men áleýmettik mańyzdy nysandar salynyp jatyr.
«Josparlanǵan 37 kóp qabatty turǵyn úıdiń 29-nyń qurylysy aıaqtaldy. Qalǵandary jyl sońyna deıin paıdalanýǵa beriledi», deıdi oblystyq qurylys basqarmasynyń basshysy Málik Amanov.
Keler jylǵa júktelip otyrǵan mindet te az emes. Qaladaǵy «Nursaıa», «Bereke» shaǵyn aýdandary taǵy da 43 turǵyn úımen tolyǵady. Oblys ortalyǵy mańynda ornalasqan Talǵaırań, Aqjar aýyldarynda jańa shaǵyn aýdandar boı kótermek. Qazir osyǵan baılanysty 361,78 ga jer telimi ıgerilip jatyr.
Oblystyń bas qurylysshysy atyraýlyqtardyń «Nurly jer» memlekettik baǵdarlamasyna suranysy joǵary ekenin aıtady. Búginge deıin 68 otbasy ıpotekalyq qaryzdardy sýbsıdııalaıtyn jańa baǵdarlama arqyly baspanaǵa qol jetkizipti. «Jyl sońyna deıin taǵy da jeti otbasy jańa páter kiltin alady. «Nurly jer» baǵdarlamasy aıasynda 2016 jyldan beri kommersııalyq bankterdegi ıpotekalyq qaryzdy sýbsıdııalaý naýqany bastalǵan edi. Sýbsıdııalanatyn qaryz kólemi – 10 paıyz, qalǵan bóligin Qazaqstan ıpotekalyq kompanııasy tóleıdi. Baǵdarlamanyń tıimdi sharttary turǵyndardyń kóńilderinen shyǵýda» deıdi «Qazaqstan ıpotekalyq kompanııasy» AQ-tyń Atyraý aımaqtyq bólimshesiniń dırektory Əlimjan Dabysov.
Sondaı-aq əleýmettik az qamtylǵan turǵyndarǵa nesıelik jəne jalǵa beriletin myń jarym pəter salý josparlanǵan. Munaıly aımaqtaǵy qurylystyń qarqyny joǵary ekenin salynyp jatqan 10 mektep, 13 balabaqsha, 3 densaýlyq saqtaý nysany, 11 mádenıet úıi, 4 sport kesheninen de baıqaýǵa bolady. Aldaǵy ýaqytta aýdandarda 10 qatty turmystyq qaldyqtar polıgony salynady. Sonymen qatar «Atyraý oblysy Jaıyq ózeniniń sýyn molaıtý jáne gıdrologııalyq rejimin jaqsartý» jobasy boıynsha jumystar aıaqtalýda. Jaıyq jáne Qıǵash ózenderin sýlandyrý boıynsha jobalaý-smetalyq qujattama jasaqtalyp, jergilikti bıýdjetten jumysty bastaýǵa qarjy bólindi.
Al oblys ortalyǵyndaǵy qurylysy toqtap qalǵan konsert zalyn akvaparkke aınaldyrý jaıly ınvestorlardan usynys túsken. Júzege asyp ketse, qabyrǵalary ǵana qalanyp, qańyrap turǵan ǵımarattyń sáni kirer edi.
Baqytgúl BABASh,
«Egemen Qazaqstan»
ATYRAÝ